總結：分裂後首戰！勇士散檔式崩壞
20181116
東網電視
更多新聞短片
杜蘭特同積蒙格連(左)可能口和心不和。(美聯社圖片)
勇士喺NBA作客以86:107不敵火箭，爆出分裂鬧劇後首戰出現散檔式崩壞。雖然杜蘭特同積蒙格連表面上講和，但實際上，積蒙格連夢遊咁得0分，仲試過出現低級失誤浪費快攻機會，令人擔心佢同杜蘭特係口和心不和。
美國傳媒發現，兩大新聞人物喺練習中握手講和，但積蒙格連用粗口鬧杜蘭特，被罰內部停賽1場後，復出明顯心不在焉，正選上陣23分鐘竟然得3次起手，而且全部炒晒，仲有5次失誤，包括組織快攻失手，最後全場得0分、5個籃板同5次助攻。
杜蘭特有20分、5個籃板同2次助攻，接應過積蒙格連嘅傳送快攻入樽得分，表面同對方冇咩嘢，不過佢15投得6中，得分效率唔高，加上奇利湯臣得10分同3個籃板，史堤芬居里又因傷繼續缺陣，導致勇士喺士氣低落下大比數慘敗。
另一方面，火箭官方宣布放棄安東尼，對方加盟後只係打咗10場，因為融入唔到戰術體系被踢走，不過火箭喺佢缺陣期間，的確打得更好，今場占士夏登有27分、3個籃板同3次助攻，包括第3節獨取12分，帶領火箭完成3連勝反彈。
同日，鷹隊作客以93:138不敵金塊，林書豪後備上陣25分鐘，取得16分、5個籃板同5次助攻，效率相當高，而且職業生涯得分突破5,000分，可惜鷹隊疑似專登擺爛，冇意重用佢連輸6場。相反，米沙比有18分、9個籃板同5次助攻，協助金塊結束4連敗。
最新賽果(左方主場)
火箭 107:86 勇士
金塊 138:93 鷹隊
快艇 116:111 馬刺
支持本地運動員，一齊去「睇體」！
東網體育FB同你追實體壇每個精彩時刻！