總結：繼續崩壞！勇士分裂後遺症好大鑊
20181118
東網電視
更多新聞短片
杜蘭特(右)同積蒙格連內訌搞到史堤芬居里(圓圖)都冇眼睇。(互聯網)
勇士喺NBA作客以109:112不敵獨行俠，爆出分裂鬧劇後連輸2場，內訌主角之一嘅積蒙格連唔知真傷定假傷，突然缺陣，杜蘭特就喺完場前關鍵時刻，連續兩次起手唔中錯過反超前機會，美國傳媒都覺得勇士嘅分裂後遺症好大鑊！
除咗史堤芬居里同古辛斯繼續養傷，積蒙格連都話受到腳趾舊患影響，至少缺陣2場，不過有美國傳媒懷疑，勇士教練卡爾想平息內亂重整士氣，先至會安排積蒙格連休息，實際上佢根本唔需要避戰，分裂後遺症好大鑊，真相係點要由球迷判斷。
比賽方面，杜蘭特有32分、4個籃板同3次助攻，奇利湯臣有22分、3個籃板同4次助攻，不過KD喺完場前連續兩次進攻唔入，跟手暫停完畢湯神嘅跳射又唔中，導致勇士2連敗，唯有希望史堤芬居里講得冇錯，杜蘭特同積蒙格連冇隔夜仇會真正和好啦！
同日，火箭喺主場以132:112擊敗帝王，占士夏登有34分、4個籃板同8次助攻，基斯保羅有24分、4個籃板同9次助攻，協助火箭4連勝，放棄安東尼後重返正軌。相反，黃蜂喺主場加時後以119:122不敵76人，甘巴獲加瘋狂取得60分、7個籃板同4次助攻都輸。
最新賽果(左方主場)
籃網 119:127 快艇
黃蜂 119:122 76人(加時)
溜馬 97:89 鷹隊
魔術 130:117 湖人
塘鵝 125:115 金塊
塞爾特人 86:98 爵士
公牛 83:122 速龍
火箭 132:112 帝王
獨行俠 112:109 勇士
太陽 100:110 雷霆
支持本地運動員，一齊去「睇體」！
東網體育FB同你追實體壇每個精彩時刻！