【特稿】唔踢中超？侯克邊有2億買飛機呀
20181118
東網電視
更多新聞短片
能夠踢波踢到擁有私人飛機，呢個世界唔係有好多球員做得到，估唔到巴西「巨躉射手」侯克稱唔上巨星級別，依家都拍住尼馬，買咗架同系嘅Embraer商務私人飛機，中超啲錢似乎真係好易賺！
效力新鮮出爐中超冠軍上海上港嘅侯克，近日返巴西度假，喺Instagram鋪咗張坐喺自己架飛機樓梯嘅相，引起巴西球迷關注。佢架私人飛機係巴西航空工業公司嘅出品，單價超過2億港元，機身噴咗金黑兩隻色，內艙仲有侯克自己嘅簽名壁畫。
養機一架飛機唔係易事，計埋飛機起降、過夜停泊機場、清潔維修、燃油同機師薪水以至保險，通常一架飛機嘅維護費用，就佔咗飛機價錢嘅10%左右。以尼馬架Embraer Legacy 450為例，唔計燃油之類飛行消耗，每年固定開支就要成50萬美元（約392萬港元）以上。睇嚟年薪有成1,760萬鎊（約1.8億港元）嘅侯克，呢幾年喺中國確實賺到盆滿砵滿。
32歲嘅侯克一直同人講自己退休前，必定會返巴甲為愛隊彭美拉斯打拚，所以佢一鋪張相出嚟，就有「綠軍」球迷留言：「喺中國賺夠錢囉喎，好返嚟幫彭美拉斯贏冠軍，幫我哋實現夢想。」
當然比起C朗嘅新款美國製灣流G650，侯克嗰架只屬「Cheap嘢」，事關呢個系列嘅飛機好受富豪歡迎，例如美國首富巴菲特、中國富商馬雲、王健林、香港商界鉅子李嘉誠都擁有灣流G550，鴻海集團董事長郭台銘，更有3架灣流飛機。
●擁有私人飛機十大球星
1.C朗──美國灣流G650私人飛機，價錢6500萬美元。
2.美斯──巴西Embraer Legacy 650私人飛機，單價2590萬美元。
3.伊巴謙莫域──美國Cessna Citation Longitude 私人飛機，價錢2700萬美金。
4.保羅普巴──美國灣流G280私人飛機，單價2450萬美元。
5.碧咸──加拿大Bombardier Challenger 350私人飛機，價錢2666萬美元。
6.尼馬──巴西Embraer Legacy 450私人飛機，單價2590萬美元。
7.朗尼──法國達索獵鷹900私人飛機，價錢2000萬美元。
8.加里夫巴利──美國Cessna Citation XLS私人飛機，單價1300萬美元。
9.賓施馬──美國Cessna Citation CJ4私人飛機，價錢1100萬美元。
10.阿歷斯山齊士──美國灣流G300私人飛機，單價945萬美元。
東網體育FB同你追實體壇每個精彩時刻！
支持本地運動員，一齊去「睇體」！