【港超專版】為咗呢樣嘢 去幾遠都冇所謂
20181118
東網電視
更多新聞短片
佳聯元朗今季予人感覺年輕、有活力、熱血，不少球員更在青年軍期間已跟隨過主教練郭嘉諾，其中一位便是曾於香港隊U20與「郭Sir」合作、視青年軍教練盧均宜和利物浦的右閘阿歷山大阿諾特為偶像的21歲後衞謝偉俊（Danny）。
今季加盟佳聯元朗，練習地方由九龍轉到新界，家在土瓜灣的Danny今天不怕路遠，願為自己足球路打算：「為咗夢想，幾遠都冇所謂！」 圖／文︰陳焌鏗
在老牌球會標準流浪出身，同期隊友為效力中甲球會梅州客家的後衞徐宏傑、理文前鋒鄭兆均。眼見母會降班，昔日戰友各散東西，Danny坦言：「一定有啲可惜嘅，始終由細踢到大，都想同隊，但係大家際遇唔同，佢哋有好嘅發展，都戥佢哋開心！」
難忘青少年足總盃遭絕殺
不過，選擇加盟元朗，就是一個重新出發的機會，Danny誓要追回失去的時光：「自己想用時間去盡量彌補番之前錯失咗嘅機會，想去追，自己有心喺足球上發展，想趁依家闖下，等自己有穩定出場機會，再睇下有冇球會畀機會我試，只要有機會都會想試。」
倘若球迷有留意青少年足總盃，想必記得2015年那屆陳柏熹的世界波，然而這球靚絕的入球，對Danny來說亦別具意義：「最難忘一定係足總盃對飛馬，我哋臨完場前追和，但係最後1分鐘畀陳柏熹中場笠射，最後輸咗攞亞軍，係一個遺憾。我都希望喺職業生涯可以彌補呢個遺憾，因為我踢得波，都希望一直進步、爭取錦標，喺我人生入面都有啲榮譽。」
處子入球係球證誤判
司職後衞的Danny，早前在高級組銀牌8強對陣富力R&F時取得職業生涯首個入球，但他卻苦笑地說：「個紀錄就係，哈哈！但其實個波係中柱撞入，葉子俊都睇到！球證可能畀球員遮住晒睇唔到，其實就算睇片，都似係我撞入嘅，不過實情係中柱。嗰球其實係咁啱飛過去，但係踢唔中個波，不過如果個波唔係中柱，我相信我都可以補中囉！」
他續說：「我想證明番自己，如果有機會，我想用自己實力真真正正入番球，咁就OK喇！」至於他今季為自己訂下的目標，既不是入球，也不是助攻︰「自己希望有機會正選上陣10場！」
青春班拍住上 最愛整蠱隊友
一眾隊友年紀接近，想必更容易建立友誼，年輕人總愛作弄他人，問及Danny隊中誰是受害者時，他笑稱：「陳廣豪囉，我哋笑佢好似小丸子個阿爺咁，個髮型好似。之前同佢講嘢呢，佢唔會應你，跟住諗一諗，佢就會答你：『哦』，咁就完啦。」
Danny亦透露平日放假喜歡到健身室加操，休息時喜歡打機，他透露喜歡玩足球遊戲，還一臉認真地說：「喺球場入面學到嘅嘢，喺遊戲入面運用番出嚟都唔容易！」他還藉機呼籲隊友在遊戲內建立球隊，閒時可一起「作戰」，增進感情。
Profile
•出生日期：1997年1月30日
•位置：後衞 球衣號碼：2
•身高：1米73 體重：59公斤
•現效力球隊：佳聯元朗
•曾效力球隊：駿其天旭（丙組）、 標準流浪（港超）