【賽後解碼】英格蘭醫好心理病　大把世界

「哈神」打救英格蘭，周日(18日)晚歐國聯A4組煞科戰上演生死鬥，英格蘭年輕戰將發揮優良心理素質，於末段憑住連格及哈利卡尼各省1粒，以2比1反勝應屆世盃亞軍克羅地亞，成功反壓西班牙取得首名出線資格，「格仔兵團」則慘遭降班厄運。

克羅地亞今屆世界盃演出令人驚喜，主要都係靠打出士氣，團結一致，即使踢加時，後勁仍然凌厲，但創造歷史之後，似已完成任務，鬥志亦消失，射手文迪蘇傑退出國家隊，世界足球先生莫迪歷無論踢皇馬或國家隊，表現亦大不如前，球員生涯或從此走下坡。

克羅地亞亦一如以往世界盃奇兵，大賽後散晒，好似1994年保加利亞、瑞典，2002年土耳其、南韓，都只係曇花一現，無以為繼。

反觀，英格蘭以往被批評心理質素差，但今場卻可以反敗為勝，值得一讚，連最弱一環都克服埋，前景值得期待。