我主場！東方強攻「夢想家」　客軍賽前勤操

上季費格遜的出現，對香港籃壇來說猶如隕石天降。今季這位「入樽王」強勢加盟香港東方，其東南亞職業籃球聯賽（ABL）地標戰即以絕佳姿態帶領球隊作客以107比75技術性擊倒澳門戰狼。今晚8時香港東方即將迎來今季首場ABL主場賽事，於修頓室內場館大戰台灣球隊寶島夢想家，「入樽王」與球迷心情一樣：「好期待！」　　

「為籃球做過最瘋狂嘅事？一定係成年冇得打籃球啦！」兩年前費格遜來港加盟遊協，但因為外援名額要居港1年才正式被註冊，苦等到今年才於甲一亮相。正值籃球員生涯黃金時期，卻不能打比賽，是一種「這麼近，那麼遠」的折磨。那一年他可以做的，只有拚命訓練，還有默默等待：「我唔認為等足整整一年先可以打籃球係『好值得』嘅事，因為我真係好愛籃球，要等1年真係好瘋狂，成世都未試過咁耐冇得打籃球！但都算係有回報，大家可以見到我打波，東方亦因而賞識我。」

大力入樽睇得又嚇得

球迷一定記得這位29歲美籍前鋒於甲一處子戰狂轟40分，而今季加盟東方後，他亦不負眾望，ABL首戰交出26分另加10個籃板，成為該仗最佳球員。無論剷籃、入樽、外圍投射，還是控球、籃板都一樣了得，幾乎「全能」的費格遜成功贏得香港球迷歡心，令他收穫「港版字母哥」及「香港大帝」的稱號：「哈哈！我都唔知道大家咁叫我，兩個花名我都鍾意嘅，都幾正面！」

訪問期間他總是把「Everything」掛在口邊，原來他對自己要求甚高，更以「No Limit」（不設限制）形容自己：「杜蘭特同保羅佐治都係我喜愛嘅球員，因為佢哋係嗰種『瓣瓣掂』嘅球員。我唔想只係做一個射手或者防守球員，我希望兼顧每一方面！原因好簡單，你唔使擔心冇得出場，因為教練總會搵到你可以貢獻嘅地方。」

上仗面對擁有前NBA冠軍艾迪居里及印尼籍國寶級控衞胡桑的戰狼，費格遜仍能輕鬆「爆樽」，「點解你咁鍾意入樽？」

記者問他，此時「入樽王」給大家一個驚喜的答案：「其實我唔係咁鍾意入樽咋……但如果有機會，我一樣都會咁做，因為可以威嚇對手，亦都可以激勵隊友。比賽會見到我周圍飛，但唔使太擔心。」

隊友勤力欣賞胡卓斌

談到新球隊，費格遜直言上季「好憎東方」，難忘上季被東方球員狠狠地「凍結」；正式加盟後，更發現隊友們殊不簡單：「呢隊波真係非常勤力，特別係阿Ben（胡卓斌）！佢對住其他強壯嘅外援，體形雖然輸蝕，但都頂得住，佢係隊中我最鍾意球員之一。」

香港東方今季積極爭兵，誓要重奪ABL總冠軍，費格遜豪言：「今季目標梗係每一場都要贏！我唔理會數據，我嘅工作就係填補球隊任何缺失，幫球隊贏波、贏冠軍。」（有線661及601台周三晚8時直播）

【余樂詩報道】

[4:15pm更新]客軍寶島夢想家昨晚先到泰國轉機再飛香港，球隊稍作休息後，今天下午已恢復訓練為GAME 2做準備。上季錄得1勝19負的夢想家，今季大增班費至5000萬台幣，決心爭取更佳成績，日前在首仗便擊敗有亞歷山大助陣的新加坡騰飛之獅，士氣大振，在田壘、李學林、陳孝榮及陳世念等華將，以及Tevin Glass、Malcolm Miller及William Artino等外援合力下，被視為今季其中一支實力大爆發的隊伍。