【魔獸掛靴】40歲杜奧巴：係時候做其他事
20181122
東網電視
更多新聞短片
杜奧巴冇得再捕捉他了，呢位40歲科特迪瓦名將正式宣布退休，回顧20年球員生涯，呢位「魔獸」射手話，影響佢最深係莫連奴，全因「寸王」一句話，令自己打破迷思，先至有之後嘅輝煌足球事業。
杜奧巴所指係2004年由馬賽加盟車路士首季，覺得自己由王牌，突然變成一位「普通球員」，搞到好迷失，佢話：「加盟車路士第一季，我想返去『舒適區』馬賽，因為喺馬賽，我係球隊核心。但莫連奴同我講，如果我淨係想做球隊大佬，就返去馬賽，因為車路士有22位大佬，每位都要接受呢種情況，同時一齊努力工作，否則就返去前球會，做唯一嘅大佬，人人都會支持你。」
「魔獸」聽完呢番說話，恍然大悟，明白車仔粒粒皆星，人人都可以一季射入十幾球，所以自己必須做嘅事，就係接受考驗，提升個人能力。
自此之後，杜奧巴專注為車仔搏殺，總共上陣381次射入164球，為車仔捧過4次英超冠軍、4次英足盃、3次英聯盃，仲有球隊至今唯一一次歐聯冠軍。
杜奧巴2012年離開車路士，轉投土耳其加拉塔沙雷、中超上海申花，2014/15年球季重返車路士，幫同樣第二度上「車」嘅莫連奴，捧英超冠軍，莫連奴當年嘅一句話，唔止係幫杜奧巴，亦幫咗自己，難怪兩人一直係最佳拍檔。
杜奧巴2015年去美國搵食，先係加盟美職蒙特利爾衝擊，上年入主美甲球隊鳳城起義，成為班主兼球員，上陣26次入17球。「魔獸」話自己仍然體力充沛，並非真正想掛靴，但始終都係時候，去做其他事，展開人生新一頁，至於佢有乜大搞作，或者遲下有分曉。
支持本地運動員，一齊去「睇體」！
東網體育FB同你追實體壇每個精彩時刻！
Follow東網體育IG一齊撐本地運動員！