【西多夫】唔算特別嘅特別人生

20181207
東網電視
更多新聞短片
雲尼亞里將會同莫連奴(左)交手。(Getty Images)
今個星期富咸喺英超作客曼聯,雙方領隊相遇好有趣味性。富咸領隊雲尼亞里頂級球會同護級球隊都肯帶,表面睇落唔算特別嘅特別人生,相比紅魔領隊莫連奴嘅Special人生哲學,完全係兩個世界嘅人。
賽前雲尼亞里同記者講,佢決定拯救富咸後,莫連奴係第1個發短信歡迎佢回歸英超嘅人,內容係「歡迎返嚟,祝一切順利」。根據雲尼亞里所講,莫連奴私底下非常有禮貌,而且佢哋有好多話題,佢仲話覺得寸王係個好人添!
或者大家記得,2004年雲尼亞里被車路士炒魷,接替佢嘅就係莫連奴。寸王上任後,帶領車路士連續兩季奪得聯賽冠軍,打破當時曼聯同阿仙奴壟斷英超嘅格局。雲尼亞里用4個球季都完成唔到嘅工作,莫連奴一上車就成功。
雲尼亞里執教過唔少頂級球會,但比起攞聯賽錦標,佢更擅長拎盃賽冠軍,同埋領軍護級或者升班,所以李斯特城創造奇迹奪得15/16年球季英超冠軍,或者係佢執教生涯最難忘嘅章節,令佢原本唔算特別嘅人生變得特別。
我好難相信,雲尼亞里答應執教李城嘅時候,有諗過拎英超冠軍,不過佢嘅故事話畀我知,只要努力,夢想可以成真,而且人嘅一生,唔需要追求每件事都好特別,做你覺得應該做嘅事,享受人生嘅樂趣更重要。 文:西多夫
支持本地運動員,一齊去「睇體」!
東網體育FB同你追實體壇每個精彩時刻!