港超聯　東方龍獅鬥香港飛馬玩喪攻

「中銀人壽香港超級聯賽」今日下午5時30分上演好戲，由東方龍獅於主場香港大球場惡鬥香港飛馬，雙方上輪聯賽都未能取勝，為重回勝軌，今仗勢演激戰，球迷萬勿錯過！文：陳焌鏗

東方龍獅上輪聯賽與和富大埔握手言和，今場面對爭標分子香港飛馬，主教練陳婉婷揚言要袋走3分：「上仗係一場好艱難嘅比賽，今個禮拜訓練嘅重點係進攻，因為我哋希望攞3分，展示爭勝決心！」

「牛丸」：唔諗陳7打咩位

面對攻擊力強悍的飛馬，「牛丸」認為關鍵在於中場：「除咗把握力之外，我哋希望喺中場增強控制同活力。講到勝負關鍵，我諗係能唔能夠牽制飛馬前線嘅威脅，要做好防守部署之餘，我哋都要透過中場去組織攻勢。」「牛丸」同時期望進攻球員能發揮水準：「我估唔到係咪陳肇麒踢中堅，始終佢哋都有幾個球員用，如果進攻球員發揮到水準，我唔擔心對手邊個踢中堅。」據悉，東方中堅井川祐輔受傷，今仗未能上陣。

客軍香港飛馬上輪聯賽不敵傑志，主教練陳浩然指球隊狀態不足是落敗關鍵：「之前我哋休息咗3個禮拜，之後先對凱景，相比起對手之前5日踢2場，我哋喺速度同狀態都輸蝕，所以踢得好辛苦。」面對強敵東方龍獅，「陳Sir」表明要先做好防守：「東方龍獅暫時係聯賽失球最少嘅球隊，如果我哋先失波會好難踢，所以今場我希望唔失波，然後再等機會進攻。」

香港飛馬目前已連續4場失球，「陳Sir」望球員多溝通，並認為大球場對己隊有利：「香港大球場係飛馬之前嘅主場，熟悉程度比其他球隊好。防守方面，上場失嘅第一球係因為球員冇出聲，令隊友冇留意身後有對手致失波，所以希望大家今場可以改善溝通。」