港超聯 作客富力R&F 冠忠南區搏盡

2018年12月07日 23:17
東網電視
更多新聞短片

目前暫居港超聯榜首的富力R&F,今午2時30分假廣州燕子崗體育場迎戰冠忠南區。富力R&F上周主場以5比2擊敗佳聯元朗,主教練楊正光除了對該場大勝感滿意,亦對球隊不再依靠死球攻勢入波感高興︰「好滿意球員上場喺有組織攻勢下入波,除咗達到我嘅要求外,一班前鋒都可以提升番信心,始終入波對前鋒嚟講好緊要。」■何彥霆廣州直擊

楊正光:防死球突襲

然而,「光Sir」亦提醒球隊要在防守上加強防範︰「冠忠南區踢法一向傾向迅速反擊,角球、罰球都有一定把握,睇番數據,佢哋嘅入球來源都以呢兩種方式為主,所以我哋喺由攻轉守方面要有所防範。上場對元朗,呢方面就做得唔太理想,希望今場有改善。」傷兵方面,守衞沙沙目前未能參與操練,不過謝家強已復操,有望爭取上陣機會。

聯賽「3哥」冠忠南區目前比富力R&F少1分,雖然跟次席的東方龍獅同分,卻比對方多踢1場,為令球員有足夠休息,該隊提早1日於周四(6日)出發往廣州,惟陣中分別有蘇沙及陳港斌因傷未有隨行,後者更因十字韌帶受創,或需要接受手術治療,相信要養傷一段長時間。

對於廣州近日氣溫下降,主教練鄭兆聰認為影響不大,並希望球隊繼去季後再次作客擊敗富力︰「球隊目前面對好多傷病,只有18名球員隨隊北上,但都希望好似上年一樣,踢一場好波。今場係今年最後一場比賽,球員都會搏到盡。慶幸踢埋呢場後,有成5個禮拜冇比賽,我哋可以爭取時間畀受傷嘅球員康復,包括返咗塞爾維亞養傷嘅高美斯。」