【有片】堅爆！新當路雲德甲首演2分鐘入波
20181208
東網電視
更多新聞短片
祖殊沙根特一戰成名。(美聯社圖片)
即睇祖殊沙根特德甲首個入波：https://bit.ly/2RJdM9O
今朝德甲雲達不來梅喺主場以3比1砌低杜塞爾多夫，取得近6場以來首勝。要數到不來梅贏波功臣，肯定係只得18歲嘅美國超新星祖殊沙根特，佢後備登場兩分鐘就入波，為球隊鎖定3比1勝局。呢個美國仔呢幾年經歷好似坐穿梭機一樣冒起，嚟緊真係大把前途，話唔定可以做到「新當路雲」，挑戰美國史上最佳球員添！
咪以為我哋吹得好大，呢個今年2月20日先夠18歲嘅美國新星射手，今年2月加盟不來梅後，直到今季先可以有資格代表球隊上陣。今場之前，佢幫雲達不來梅二隊喺德丁踢咗12場入7球，今場佢後備上陣2分鐘第1次掂波就入波，雖然個波唔係難度高，但走位好同把握到，都一樣抵讚。
事實上，祖殊沙根特踢處子戰一向幾叻，佢今年5月28日首次代表美國國家隊出賽對玻利維亞就已經入波，至今6次代表美國上陣就入2球。此外，佢舊年以17之齡代表美國出戰U20世界盃都射入4球，同年踢埋U17世界盃又入3粒，天份同射術都毋庸置疑。依家佢喺雲達不來梅展開佢職業球員生涯，其實同美國史上最佳球員當路雲一樣，後者當年第一份職業合約都係喺德甲，只係踢利華古遜。話唔定祖殊沙根特再踢落去，都可以有一樣出色成就呢！
東網體育FB同你追實體壇每個精彩時刻！
支持本地運動員，一齊去「睇體」！