【馬王起雙飛】大摩神回記者：狀態妙到毫巔

香港國際賽聽日就到，「美麗傳承」被喻為港隊奪標希望，呢匹6歲新西蘭自購馬上年配梁家俊勝出浪琴表香港一哩錦標，今年由潘頓操刀作衛冕戰。

今朝「美麗傳承」由潘頓出試，喺大圈快踱一圈，目測冇波勾情況，情緒亦集中，神色狀態俱佳。課後，練馬師大摩踩單車去機坪接馬，動態雖屬意料之中，惟當潘頓同大摩傾到如火如荼之際，「美麗傳承」突然搶Fo，一對後腳猛咁踢高，High到震天。

其後，大摩被記者問及「美麗傳承」晨課觀感時，練者話隻馬今朝操完起雙飛，證明競賽意欲十分旺盛，狀態妙到毫巔，相信大家都有目共睹，不過佢又話沙田馬場啲草長咗好多，未必再破到「美麗傳承」自己喺田草1600米保持嘅香港紀錄時間。