沙拿戴帽炒般茅 利物浦竟然係贏運?

20181208
東網電視
更多新聞短片
(Getty Images)
神鋒再現又有運,利物浦你玩晒啦!英超紅軍作客般尼茅夫,穆罕默德沙拿再現本季少見嘅鋒芒,個人連中三元大演帽子戲法,其中第二、三個士哥勁有卡士,展現頂級速度、技術及足球智慧。紅軍大勝4:0,表面睇雙方分野好大,但事實上今戰利物浦勁有運,越位入波、禁區手球、門將門前勾低對手,球證全部睇唔到,造就利物浦大數般茅,暫時升上英超榜首。
雖然利物浦初段冇乜優勢,但25分鐘羅拔圖法明奴遠射,般茅門將比高域撲波甩手,畀穆罕默德沙拿門近門執死雞先開紀錄,呢球係佢喺紅軍第40個英超士哥,呢位埃及國腳只係用咗52場聯賽就做到,令佢成為喺英超最快入咗40粒嘅紅軍球員。易邊後法明奴喺中圈附近妙傳,沙拿帶波舞龍咁舞殺入禁區射遠柱得手,之後對方後衞史堤夫曲克擺老烏,加埋沙拿整多粒戴帽,最終大勝4粒。
齋睇比數紅軍好似贏得好輕鬆,但沙拿先開紀錄嗰球,佢有越位之嫌,但旁證發雞盲睇唔到,而下半場初段中堅華基爾雲迪積克喺禁區內犯手球,門將艾利臣門前勾低對手,球證又睇唔到,加埋對手送個烏龍波,咁樣講並非批評紅軍,反而係覺得佢哋一種拎冠軍必須有嘅運氣,始終聯賽漫漫長路,要成季保持最高水準堅難,所以能夠攞冠軍嘅球隊,喺狀態麻麻嗰陣點都有運氣幫助。
以往利物浦出名冇運,自1992年英超成立後未做過聯賽盟主,包括2014年謝拉特一次跣腳就跌咗個冠軍畀曼城。但正所謂否極就會泰來,今季頭16場取得13勝3和未輸過,已不斷刷新球隊最佳英超開局,過程中充滿好運,包括默西賽德郡打吡末段,愛華頓門神比克福特派膠未將傳中波拍出底線,造就奧歷治絕殺,今仗亦如是,呢種超級好運竟發生喺「地獄黑仔王」紅軍身上,全部體現出好波不如好運,因此同樣弗爆嘅曼城唔好咁老定住。
支持本地運動員,一齊去「睇體」!
東網體育FB同你追實體壇每個精彩時刻!