港超聯 凱景鬥佳聯元朗爆「未來」之戰

2018年12月08日 23:25
東網電視
更多新聞短片
凱景鬥佳聯元朗爆「未來」之戰。

「中銀人壽香港超級聯賽」周日(9日)上演獨腳戲,凱景主場深水埗運動場力鬥佳聯元朗。兩支球隊均以年輕球員為骨幹,每仗都是他們展現能力的好機會,同燃「青春火」下勢必搏到盡!(周日下午2時30分開賽)

凱景上仗一度領先夢想FC,惟最終以3比4落敗,未能打開聯賽勝利之門,主教練馮凱文坦言失望:「上場一啲好低級嘅防守錯誤導致輸波,唔單止係華人,連外援都犯呢啲錯,難免失望。」是役面對本季表現驚喜的元朗,「馮Sir」點出勝負關鍵:「信心喇,我有睇元朗對富力場波,元朗班球員作客下都好有信心想去贏,呢樣嘢係我哋欠缺嘅。」「馮Sir」又表示球隊會作出改變:「今個禮拜我會同其他教練商討下,無論位置、陣式定踢法上都會有啲微調。」

郭嘉諾:勝負外更想睇到「未來」

客軍佳聯元朗早前休戰達一個月後,上輪即北上作客富力R&F見負,主教練郭嘉諾同樣認為球隊需改善防守:「目前我哋踢咗8場波,場場有波入,好嘅地方要保持,同時我哋都要踢一啲唔失波嘅賽事,防守嘅緊密性及預謀要做好啲。」元朗與凱景球員大部分均為年輕小將,「郭Sir」期望雙方都能踢出鬥志:「今場波我唔想將勝負睇得咁緊要,因為兩隊都係想畀青年球員機會,希望班球員展示到畀球迷睇,佢哋係香港未來,而唔係一隊贏一隊輸就算,好想見到佢哋嗰團火!」