【不斷更新】止頹勢!曼聯贏四個一皮

2018年12月09日 00:12
東網電視
更多新聞短片
(Getty Images)

【00:52】【全場完】曼聯 4:1 富咸
經過三場聯賽不勝之後,曼聯今仗清風送爽炒富咸4:1,睇到呢班波非不能,只不為。莫連奴收起敗家仔保羅普巴,中場前個個畀波走位,皮球運送非常快速,富咸簡直防不勝防,上半場已領先3球奠定勝基。換邊後曼聯睇定嚟食,雖然輸番球12碼,不過福仔窄位射近柱,對手門將實力麻麻救唔到,曼聯贏四個一皮重返正軌,紅魔球迷一定睇得開心。

【00:41】曼聯 4:1 富咸
82分鐘,福仔於左路窄位勁射近柱,門將沙治奧列高救唔到,曼聯4:1!

【00:26】
富咸中場森保安古沙兩黃一紅,打少一個

【00:25】曼聯 3:1 富咸
66分鐘,靴里拉禁區犯天條,阿布巴卡卡馬拉主射12碼成功破蛋,1:3

【00:16】
58分鐘,靴里拉禁區抽遠柱竟然唔中龍

【00:06】
48分鐘,福仔CUT入中路起腳被救出,盧卡古再射又中人僅攞角球

【23:48】【半場完】曼聯 3:0 富咸
曼聯球迷睇到今場愛隊嘅表現,肯定非常開心。寸王續收起保羅普巴,證明係明智之舉,冇咗呢個只識演嘢嘅「病毒」,幾個中場連格、馬達、靴里拉、福仔不斷走位拉鬆對手防線,行軍非常順暢,節奏明快嘅足球令富咸完全崩潰,最終憑楊格、馬達同盧卡古嘅入遙遙領先,下半場好大機會仲有得波入。

【23:42】曼聯 3:0 富咸
42分鐘曼聯開短角球,馬達地波交連格,連格質番個直線畀馬達後地波傳中,盧卡古門前輕鬆搞掂,3:0!

【23:38】
38分鐘,福仔射靚罰球,被對手門將救出

【23:28】
28分鐘曼聯兩粒!盧卡古直線畀福仔,福仔左路撳個地波去禁區頂,馬達一射入網

【23:19】
19分鐘,曼聯右路斬中,基斯史摩寧門前一頂斜出

【23:13】曼聯 1:0 富咸
13分鐘楊格左路發難,入到禁區窄位拉個遠柱入網,曼聯1:0!

【22:43】
曼聯主場迎戰富咸,領隊莫連奴擺番盧卡古打正選,攻中出番桑馬達同連格,保羅普巴繼續打後備。

曼聯正選陣容(4231)
門將:1迪基亞
後衞:20達洛治、4菲爾鍾斯、12基斯史摩寧、18艾舒利楊格
中場:21安達靴里拉、31尼曼查馬迪
攻中:14連格、8桑馬達、10拉舒福特
前鋒:9盧卡古

富咸正選陣容(4231)
門將:25沙治奧列高
後衞:4丹尼斯奧度爾、13添列姆、26艾菲莫臣、23祖爾拜仁
中場:24占舒利、29森保安古沙
攻中:14舒賀爾尼、10卡亞尼、3賴恩施斯隆
前鋒:9阿歷山大米祖域

【22:23】【全場完】般尼茅夫 0:4 利物浦
利物浦王牌沙拿,一係唔入一入入夠三粒,大演帽子戲法帶領紅軍炒般尼茅夫。沙拿今戰第一個士哥明顯越位,但第二、三個入波就盡顯卡士,先銜枚疾走左腳抽遠柱入網,跟手接應隊友妙傳,先擔走敵衞再過埋門將,門前面對兩個後衞冷靜篤入,可以話係今季代表作。紅軍今仗係有運,先有沙拿越位入球,之後仲有雲迪積克禁區犯手球,以及門前艾利臣於門前踢跌對手,但都冇輸12碼。利物浦大炒4:0後升上榜首,就睇吓今晚深夜曼城對車路士踢成點,到時就知利物浦會唔會過番周榜首癮。

【22:04】般尼茅夫 0:4 利物浦
沙拿戴帽呀!先用身位擔走敵衞,再扭過門將,門前淡定左腳篤入,堅冷靜!

【21:54】般尼茅夫 0:3 利物浦
68分鐘利物浦3:0呀!羅拔臣左路出波,搞到史堤夫曲克擺烏龍

【21:42】
利物浦今場真係有運,先有雲迪積克禁區手球,後有艾利臣禁區內踢跌對手,球證兩次都冇吹12碼

【21:38】般尼茅夫 0:2 利物浦
利物浦前鋒羅拔圖法明奴妙傳,穆罕默德沙拿推過對方後衞射遠柱得手,領先兩粒。

【21:30】
般尼茅夫對利物浦下半場開波。

【21:17】【半場完】般尼茅夫 0:1 利物浦
利物浦今仗冇文尼、軒達臣、祖高美斯,去到般茅地頭延續近期穩打穩紮打法,上半場機會不多,一條中場線幾正,最搶眼係左閘羅拔臣。沙拿把握對手門將犯錯,快腳衝前補入,但睇慢鏡明顯越位,紅軍半場領先1球有運,睇吓換邊後,一條鋒線會唔會有更佳表現。

【21:13】
43分鐘,米拿解圍撻Q,禁區入面出現混亂,艾利臣衝出頭槌解圍

【21:04】
34分鐘,般茅連攞兩個角球,利物浦仲頂得住

【20:55】般尼茅夫 0:1 利物浦
25分鐘紅軍入波喇!法明奴勁射比高域彈琵琶,沙拿補中開紀錄呀!睇番慢鏡,沙拿有越位之嫌。

【20:53】
23分鐘般茅大衛布魯克斯近射,艾利臣比加飛撲救出

【20:50】
廿分鐘,紅軍羅拔臣出波,沙拿爭啲篤唔到個波,基達禁區頂一抽,省到敵衞得角球

【20:43】
利物浦對般尼茅夫正式開波,頭十分鐘雙方踢得接近,12分鐘沙基利禁區頂主射罰球,省到人牆出界

【19:46】
星期六又有英超睇,「雙紅」輪流出擊唔係唔睇呀嘩!周中快車傷人,搞到各隊出現唔少傷兵,其中利物浦就有祖高美斯受傷六周,沙迪奧文尼亦都有傷在身,今輪作客般尼茅夫領隊高普逼住變陣,搵巴西新援法賓奴泰華利斯打右閘,祖爾麥迪比就頂中堅位。隊長佐敦軒達臣亦被收起,改派狀態唔曳嘅拿比基達打正選。埃及文明冇咗個「文」,梳頓沙基利得到正選機會。般茅方面亦有壞消息,王牌前鋒哥林威爾遜因傷缺陣,鋒力必有所影響。

般尼茅夫正選陣容(4411)
門將:27比高域
後衞:2西蒙法蘭西斯、3史堤夫曲克、5尼敦阿基、11查理丹尼斯
中場:19史坦尼斯拿斯、8謝法臣拿馬、6舒文、24賴恩費沙
攻中:20大衛布魯克斯
前鋒:17祖舒亞京治

利物浦正選陣容(433)
門將:13艾利臣比加
後衞:3法賓奴泰華利斯、32祖爾麥迪比、4華基爾雲迪積克、26安德魯羅拔臣
中場:7占士米拿、5韋拿杜姆、8拿比基達
前鋒:23梳頓沙基利、9羅拔圖法明奴、11穆罕默德沙拿

睇完紅軍,11點就到曼聯出場,紅魔鬼近三場英超不勝,依家僅排第八,領隊莫連奴賽前話呢場再冇唔贏嘅藉口。但球隊後防依然有域陀連迪路夫同菲爾鍾斯因傷缺陣,路爾斯華倫西亞亦未必出得,後防有隱憂。

支持本地運動員,一齊去「睇體」!
https://bit.ly/2DxX4XI

東網體育FB同你追實體壇每個精彩時刻!
http://bit.ly/2ecTF2A