【賽後解碼】天變地變 普巴冷板不變
20181209
東網電視
更多新聞短片
(法新社圖片)
英超褪色勁旅曼聯今晨喺主場以4比1大炒富咸，錄得佢哋今季喺英超最大勝仗，贏對手3球之多。上半場「紅魔鬼」憑艾舒利楊格、桑馬達同盧卡古入波遙遙領先3比0，富咸去到67分鐘憑個12碼追番球，但1分鐘後就有中場森保安古沙打茅波被逐。打多個嘅曼聯，去到82分鐘再有「福仔」拉舒福特禁區外施冷箭入網，最後大勝4比1。
曼聯今場贏波之後，暫時上到第6位。今場勝仗係佢哋近5場英超首勝，能夠擺脫頹勢贏波，主帥莫連奴今場變陣成功絕對係主因，首先佢轉打4後衞陣式，葡萄牙新仔右閘達洛治愈踢愈好，而防守做得好，唔似得之前兩場都失兩球，自然更有爭勝希望。
至於進攻上，雖然安東尼馬迪爾缺陣焗住用番盧卡古擔正，但天變地變都好，就只有保羅普巴繼續坐冷板係冇變，球隊自從少咗呢個法國中場擔正之後，進攻其實變得更流暢，今場入到4球係難得出色，如果保持得到個勢，「紅魔鬼」下半場應該有翻生希望，爭前四應該未算絕望嘅！
東網體育FB同你追實體壇每個精彩時刻！
支持本地運動員，一齊去「睇體」！