【賽後解碼】1隊輸波4隊開心！曼城好偉大

東網電視

被視為無堅不摧嘅曼城，周日(9號)英超嘗到今季首場敗仗，作客慘吞車路士2蛋。「藍月亮」今次輸波可以話係意義重大，事關英超4大球會嘅粉絲同時喺網上熱烈慶祝，試問有邊隊輸波會有咁多人一齊慶祝呀？

首先，第一批慶祝嘅肯定係車路士球迷啦，佢哋上星期輸咗畀熱刺之後，唔少人話沙利執教嘅車路士「蜜月期」已過，由爭標份子跌到「前4都唔知入唔入到」，今場勝仗就話畀全世界知，車路士有能力擊敗最強球隊，爭標實力再次得到肯定。

其次，就係啱啱大勝一場嘅曼聯球迷，「紅魔鬼」近年都畀曼城騎住，今場見到同市死敵輸波，而愛隊又踢出今季最漂亮一仗，梗係心都涼晒啦！雖然今季要反壓曼城都係冇乜希望，不過今朝有酒今朝醉，今個星期贏你就慶祝今個星期啦！

跟住就輪到阿仙奴球迷，「兵工廠」雖然N年未拎過英超冠軍，不過佢哋一直引以為傲嘅，就係03/04球季嘅「全季不敗奪冠」神話，曼城原本被睇好有力重演呢一幕，依家輸波就證明「全季不敗」唔係咁容易(利物浦仍然叫胡)嘅事呀。

最後，當然係曼城爭標大敵利物浦啦，今輪之後「紅軍」以1分力壓曼城登上榜首，以利物浦目前氣勢同穩定性，大有機會贏得球會史上第1個英超冠軍，曼城甩轆，最最最興奮就係利物浦球迷呀！

東網體育FB同你追實體壇每個精彩時刻！

支持本地運動員，一齊去「睇體」！

on.cc東網