香港隊　唔係吖嘛？韋特辭職！

足總周二（11日）中午公布，帶領香港隊在東亞盃第二圈壓過北韓，取得明年決賽周資格的主帥「白咖喱」韋特，經已向足總請辭，並加盟一日本球會擔任主教練一職。

儘管在一片爭議聲中上任，但曾擔任關島和中華台北等代表隊的韋特，旋即獲得球迷和球圈人士支持。雖然在頭兩場熱身賽，主場0比1不敵泰國，以及作客1比1賽和印尼後，韋特在選人和排陣方面都曾受到質疑，但他「一於少理」以自己的一套行事，最終再一次在其「福地」台灣揚威，帶領港隊奪得久違的東亞盃決賽周席位。在取得東亞盃決賽周入賽券後，韋特曾透露已有一連串大計，包括約戰歐洲球隊、培育新人等等。

上周六的「中銀人壽香港超級聯賽」仍有入場的韋特，其離任消息傳出後，普遍球圈中人都感到驚訝，並為港隊能否短期內覓得繼任人，感到擔心。

對於韋特辭職一事，港隊助教郭嘉諾大感愕然：「我前一日先同佢開完會，冇諗過轉個頭第二日就係咁，據我所知，佢係有試用期嘅，可能係其中一個原因可以咁快走到。」

「郭Sir」雖理解韋特決定，但同時擔心香港隊未來：「教練人望高處都明白嘅，但對香港嚟講，本來有個方向，開個頭開得唔錯，2019年嘅計畫大家都傾咗好多，例如省港盃、U23外圍賽、友賽、東亞盃決賽周等等。所有嘢都有計畫，但依家主教練辭職，都會擔心短時間請唔到下一任主教練，因為招聘時間都搞好耐，對我哋都大影響。」

「郭Sir」期盼球迷不要感到絕望：「我哋都唔想外間覺得香港足球好似好兒戲，轉個頭又有好多嘢轉咁，希望香港嘅球迷唔好因為一啲個別事件而覺得冇希望，我哋都會有plan。球員如果獲得徵召，我相信佢哋都會為香港隊努力，依家我希望盡快搵到下一個教練，繼續我哋之前實行咗嘅計畫。」此外，東方龍獅主教練陳婉婷亦對韋特此舉感到意外。