剖析曼聯生涯 加利佬：得兩隊友係世界級
20181215
東網電視
更多新聞短片
（互聯網）
睇番英超歷史，用橫掃兩個字嚟形容曼聯絕不為過，「七小福」成員加利尼維利，個人就擸走8次聯賽冠軍同2次歐聯錦標，你就算笑佢唔夠快、跑得慢、冇速度，都否定唔到其輝煌成就，而費Sir麾下嘅紅魔鬼亦係世界級勁旅，唔係點攞歐聯冠軍？但原來喺加利佬心目中，其19年紅魔生涯入面只得2名隊友去到世界級，C朗毫無疑問佔其中一位，另外一個係邊個呢？
同加利佬一齊於天空體育講波嘅利物浦名宿加歷查，就向記者大爆：「加利佬同我講過，佢踢咁耐曼聯只得兩個隊友達世界級，就係C朗同舒米高。」加利佬經歷曼聯英超黃金時代，隊友包括碧咸、傑斯、史高斯、簡東拿、朗尼、雲尼斯達萊等等，相信當中有唔少魔迷，都覺得係已達世界級，唔知呢次加歷查咁樣爆料，加利佬會唔會話自己冇講過呢？
支持本地運動員，一齊去「睇體」！
東網體育FB同你追實體壇每個精彩時刻！