【不斷更新】沙拿定江山 紅軍有運小勝
20190113
東網電視
更多新聞短片
（Getty Images）
【00:52】【全場完】白禮頓 0:1 利物浦
利物浦雖然發揮極差，前線成場發緊夢，但最後都悶勝1:0！紅軍全場攻勢廖廖可數，成個中前場都不在狀態，最後只憑沙拿換邊後冇耐射入12碼奠勝。紅軍去到球賽尾段，先後有文尼同沙拿大意浪費入球機會，之後於完場前雲迪積克更於禁區內犯手球，但球證冇判12碼，紅軍今場踢得曳之下都攞到3分，實在有幸運成份。
【00:42】
主隊反錯利物浦打反擊，文尼殺入禁區一射被閂
【00:37】
白禮頓左路出波，艾利臣剛啱快安多尼一步解圍
【00:32】
法明奴禁區外遠射被門將撲出
【00:29】
利物浦一直老鼠拉龜，狀態麻麻受制對方嚴密防守，冇乜入肉攻勢
【00:14】
白禮頓爭啲扳平，柏斯高哥斯近門一射睇怕入硬，但法賓奴啱啱閂到
【00:06】白禮頓 0:1 利物浦
利物浦終於入波喇！沙拿禁區博得12碼，親自主射入網，打開紀錄
【23:35】
半場踢成0:0
上半場利物浦完全控制大局，但未真正打出佢哋最煞食嘅進攻，白禮頓創造到嘅攻勢唔多，想偷雞入波或者要靠罰球同角球攻勢。
【23:35】
沙迪奧文尼喪推一輪後左路傳中，佐敦軒達臣插水式頭槌頂中對手彈出，威脅唔到白禮頓門將大偉畢頓。
【23:27】
阿歷山大阿諾特右路呃走對手後傳中，梳頓沙基利門前頂中柱邊出界，好接近為利物浦入波。
【23:15】格連梅利接應隊友傳中頂高，算係白禮頓1次唔錯嘅攻門。
【23:10】
安德魯羅拔臣左路底線傳中，法明奴衝前篤唔中錯過入波機會。
【23:00】
比賽開始，白禮頓先開波。
【22:25】
利物浦喺英超作客白禮頓，除咗有羅拔圖法明奴、穆罕默德沙拿同沙迪奧文尼爭取入球，仲搵埋梳頓沙基利打正選，令人覺得紅軍領隊高普好想喺聯賽不敵曼城，同埋喺英足盃輸畀狼隊後重響勝鼓。另一方面，白禮頓近況唔錯，基本保留上場聯賽作客韋斯咸嘅原陣，唯一改變係邦治取代貝拿度費南迪斯正選上陣。
白禮頓正選陣容（4-3-2-1）
門將：27大偉畢頓
後衞：22馬田蒙度亞、5李維士鄧克、4沙恩杜菲、3邦治
中場：13柏斯高哥斯、6達爾史堤芬斯、24戴夫保柏
攻中：20蘇利馬治、9約根盧卡地亞
前鋒：17格連梅利
利物浦正選陣容（4-2-3-1）
門將：13艾利臣比加
後衞：66阿歷山大阿諾特、4華基爾雲迪積克、3法賓奴泰華利斯、26安德魯羅拔臣
中場：14佐敦軒達臣、5韋拿杜姆
攻中：23梳頓沙基利、9羅拔圖法明奴、10沙迪奧文尼
前鋒：11穆罕默德沙拿
------------------------------------------------------------------
【全場完】
韋斯咸1:0阿仙奴
【22:22】全場結束，韋斯咸領隊柏歷堅尼振臂慶祝勝利。
【22:20】
盧卡斯托拉拿開出角球被法比安斯基跳起接實，浪費阿仙奴1次進攻機會。
【22:14】阿仙奴球員開始急，唔計補時得番5分鐘。
【21:59】
阿仙奴明顯加強進攻速度，韋斯咸調走阿拿奧杜域同拿斯尼，安排安祖卡路爾同辛迪加斯入替。
【21:59】
阿仙奴用埋最後1個換人名額，比利連入替美蘭尼爾斯。
【21:56】
伊禾比推入禁區左路窄位起腳柱邊斜出，仲未能夠幫阿仙奴追平。
【21:49】
哥拉辛拿斯從後剷低韋斯咸嘅米查利安東尼奧，球證出示黃牌警告佢。
【21:48】
阿仙奴變陣，盧卡斯托拉拿同艾朗藍斯分別入替格列沙加同梅斯達菲。
【21:43】
古安杜斯推到禁區頂遠射唔中框，考驗唔到韋斯咸門將法比安斯基。
【21:36】
韋斯咸1:0阿仙奴
迪格蘭賴斯接應拿斯尼禁區內橫傳抽入，韋斯咸入波先！
【21:34】下半場開始喇！希望有波入。
【21:16】
半場踢成0:0，完半場前迪格蘭賴斯接應菲臘安達臣開出角球跳頂斜出，嚇一嚇阿仙奴門將賓特尼奴。
【21:02】
菲臘安達臣接應拿斯尼禁區頂橫射後上勁射柱邊出界，形勢上韋斯咸唔輸蝕。
【20:56】
拿斯尼表現都幾活躍，而且唔止1次受到阿仙奴球員包夾招呼，不過佢喺禁區內窄位射中網側都幾有威脅。
【20:43】
拿卡錫迪硬爆入禁區射地波，可惜角度太窄被法比安斯基擋出。
【20:40】
拿卡錫迪禁區頂嘗試起腳，可惜射唔中目標。
【20:35】
開波初段韋斯咸搓得唔錯，阿仙奴踢住守勢波先。
【20:30】
兩隊球員經過漫天泡泡後入場，韋斯咸先開波。
【17:45】
阿仙奴喺英超作客韋斯咸，奧斯爾復操咗成個星期，最後繼續冇影後備都冇份，進攻責任落喺拿卡錫迪、奧巴美揚同伊禾比身上，令人擔心奧斯爾又易受傷又冇態，遲早會被清洗。另一方面，韋斯咸簽入冇耐嘅拿斯尼獲派正選上陣，倒戈出戰要留意下佢有冇畀兵工廠球迷噓。
韋斯咸正選陣容（4231）
門將：1法比安斯基
後衞：5薩巴列達、21奧邦拿、23伊沙迪奧普、3艾朗加斯威爾
防中：16麥克盧保、41迪格蘭賴斯
中場：30米查利安東尼奧、18拿斯尼、8菲臘安達臣
前鋒：7阿拿奧杜域
阿仙奴正選陣容（3421）
門將：19賓特尼奴
後衞：5柏柏斯達夫普路斯、6哥斯尼、20梅斯達菲
中場：15美蘭尼爾斯、29古安杜斯、34格列沙加、31哥拉辛拿斯
攻中：14奧巴美揚、17伊禾比
前鋒：9拿卡錫迪
支持本地運動員，一齊去「睇體」！
東網體育FB同你追實體壇每個精彩時刻！