失晒準都贏 利物浦現冠軍特質

2019年01月13日 01:07
東網電視
更多新聞短片
(Getty Images)

英超一哥利物浦,今輪聯賽作客白禮頓。英超、英足盃兩連敗後,今仗勝負對紅軍好關鍵,但球隊完全不在狀態,埃及文明勁少掂波、中場缺創造力,連穩定先生華基爾雲迪積克尾段都於禁區犯手球,不過最後都靠沙拿射入12碼小勝1:0。要做聯賽冠軍,最緊要係識Ugly Win,球隊失晒準照贏,對紅軍問鼎錦標非常重要。

除因鬧中堅荒,要搵法賓奴泰斯利斯頂中堅位外,利物浦可以話夫添出戰,沙拿、沙迪奧文尼、羅拔圖法明奴全部正選,梳頓沙基利從後支援,如果球隊發揮正常,應可踢出悅目攻擊足球,但今仗面對白禮頓鐵桶防守,紅軍全場發揮均於水準以下,上半場僅得沙基利禁區內接應阿歷山大阿諾特右路傳送頭槌攻門較具威脅。換邊後5分鐘,沙拿於對方禁區博得12碼,佢親自主射打開紀錄。利物浦之後冇加快節奏,攻勢冇乜起色,去到下半場中段先有法明奴遠射中龍,但過唔到對手門將。去到球賽尾段,紅軍打反擊文尼去到禁區一射被閂,占士米拿左路底線出波,沙拿亦唔夠集中近門一射竟唔中龍。

去到完場前主隊大舉反擊,高空猛炸搞到華迪積克幾乎做罪人,佢於禁區解圍時頭槌頂落自己隻手度,球證絕對可以畀12碼,但最後冇表示下,紅軍險勝1粒重返正軌。

利物浦今季成為真正爭標份子,上場聯賽被打破不敗之身,英足盃亦告出局,如果今仗再贏唔到,絕對會造成極大影響。不過利物浦於發揮極差下,仍能憑一個12碼贏波,贏得肉酸並唔緊要,最緊要係個結果;球季流流長,一隊球隊冇可能長時間狀態Top Fit仗仗大勝,有能力輸變和、和變贏就係冠軍特質,就睇吓紅軍呢個運勢,係唔係可以Keep到尾。

支持本地運動員,一齊去「睇體」!
https://bit.ly/2DxX4XI 

東網體育FB同你追實體壇每個精彩時刻!
http://bit.ly/2ecTF2A