越位波贏紐卡素 熱躉狂寸車路士
20190113
東網電視
更多新聞短片
（互聯網）
周六晚英超壓軸戰，車路士主場鬥紐卡素。車仔剛於英聯盃四強首回合不敵熱刺，上仗聯賽亦於修咸頓腳下失分，今戰當然希望重返正軌。球隊於開賽9分鐘就入波，柏度洛迪古斯接應大衞雷斯後場妙傳射入，睇慢鏡有越位之嫌。球隊雖被一度追平，但韋利安換邊後入窄位靚波奠勝贏2:1。車仔全取3分，但就畀熱刺球迷勁寸，話上場投訴哈利卡尼越位嘅車仔領隊沙利，都係靠越位入球贏波。
車仔繼續用夏薩特踢箭頭，拍韋利安同柏度攻堅，大衞雷斯於開賽初段交出靚助攻，柏度殺入禁區一攞一逗射破紐卡素大門，早早為球隊取得領先優勢。睇番慢鏡，柏度接應雷斯靚傳時，隻手稍稍凸出有越位之嫌。紐卡素傾力反撲，前鋒荷西朗頓同艾約斯佩雷斯分別取得射門，但扳平要靠中堅施亞蘭奇勒，佢接應左路角球頂入網仔，半場各一平手。
換邊後車仔加強壓力，夏薩特策動攻勢施展高速盤扭，巧妙引開四名敵衞後傳交左路，韋利安於窄位起右腳射遠柱網仔搞掂，為車路士奠勝。於英聯盃四強首回合，熱刺靠哈利卡尼突破越位陷阱博得12碼，最後親自主射中鵠贏1:0，賽後沙利鬧爆英超球證唔識用VAR，點知今仗成為受益者，熱迷當然唔會放過寸佢嘅大好機會啦。
支持本地運動員，一齊去「睇體」！
東網體育FB同你追實體壇每個精彩時刻！