拿斯尼助攻冧廠　廠迷：根本應簽番佢

已經31歲，仲要已經成年冇踢職業足球，但對比番依家阿仙奴條中場線，拿斯尼似乎仲係超班！呢名前兵工廠球星，今年一月免費加盟韋斯咸，回歸後首次於聯賽打正選就對舊會阿仙奴。拿斯尼今仗踢到曉飛貢獻助攻，帶領錘仔幫1:0力挫兵工廠。當迪格蘭賴斯入波後，拿斯尼瘋狂慶祝，廠粉見到冇嬲，只係怪愛隊唔爭氣，覺得阿仙奴應該簽番呢名舊將。

拿斯尼於08至11年效力阿仙奴，之後轉投曼城攞過2屆英超冠軍，但之後開始走下坡，近一年都冇班落。到今個1月佢回歸英超同柏歷堅尼故劍重逢，首仗即有貨交，兵工廠球迷都話，拿斯尼無論走位、傳送、造波以及足球智慧，都比格列沙加、古安杜斯同伊禾比等優勝，既然領隊艾美利之前表明，今個1月球會冇錢買人，點解唔再簽入拿斯尼。

支持本地運動齊去「睇體」！

https://bit.ly/2DxX4XI　

東網體育FB同你追實體壇每個精彩時刻！

http://bit.ly/2ecTF2A