【熱曼戰】曼聯開蘇 考牌要1 take pass

20190113
東網電視
更多新聞短片
曼聯自蘇斯克查接手後,打出漂亮嘅5連勝,其快樂足球理念同進取嘅踢法深得球員認同,球迷亦重拾久違嘅笑容,今仗迎戰強敵熱刺嘅「考牌戰」,樂比認為蘇B同紅魔嘅蜜月期可延續,讓球主客和熱刺讓一球,曼聯讓球客勝啱晒合尺。
(Now 621周一凌晨零時30分直播)
其實曼聯復甦可以話係預期之內,一來之前5連勝嘅對手全部易食,簡直係送畀蘇斯克查嘅絕佳禮物,二來曼聯班球員實在畀摩連奴抑壓得太耐,蘇斯克查一來即大解放,球員自然變成脫韁嘅野馬,甚至係猛虎出籠,主將保羅普巴唔再扭計,連盧卡古都重拾射門鞋,自然令曼聯戰鬥力大增。
紅魔杜拜集訓叉足電
不過,熱刺同曼聯之前5仗對手絕不可同日而語,蘇斯克查亦不敢怠慢,趁周中空檔拉隊到杜拜集訓,佢認為短短4日集訓成效卻非常大,除咗可以幫班球員喺快車後叉一叉電,亦可加深佢同球員嘅了解,集中精神應付今場大戰。
熱刺26日踢8場攰爆
反觀熱刺就真係馬不停蹄,由於英聯盃殺入4強嘅關係,要喺26日內應付8場比賽,上周中更硬撼完車路士,戰力消耗不少。雖然近況大勇嘅孫興民會踢完今場大戰先向國家隊報到,轉戰亞洲盃,但熱刺連場大戰加上陣中兵源調動較少,相比起養尊處優嘅曼聯確係比較輸蝕。
今場對蘇斯克查亦有另一番意義,就係近期有唔少聲音支持佢坐正,當中包括德高望重嘅費格遜,據講費爵爺曾多次進出卡寧頓訓練場,畀咗呢位愛徒唔少意見。除施丹外,熱刺領隊普捷天奴亦係曼聯嘅目標人選之一,如果蘇斯克查想來季坐正嘅話,今場更加係唔衰得。一於撐蘇B,捧曼聯讓球客勝!
支持本地運動員,一齊去「睇體」!
東網體育FB同你追實體壇每個精彩時刻!
Follow東網體育IG一齊撐本地運動員!