博一博!亨利搵比利時人球前鋒救亡

20190113
東網電視
更多新聞短片
(Getty Images/互聯網)
換上咗法國著名射手亨利做主帥嘅法甲老牌勁旅摩納哥,近排戰績依然未見回升,仲繼續喺降班區奮鬥。呢位前阿仙奴箭頭踏入一月開始,積極為球隊引援,希望增強實力護級,最新消息,係佢哋已經傾掂咗同車路士借用比利時前鋒巴舒亞伊,只要日內搞掂體測,就會以借將身份加盟半季。
其實搵到巴舒亞伊,睇嚟亨利都係冇乜計,為增強火力,真係乜人都要,事關呢位25歲比利時前鋒上半季畀「車仔」借咗去西甲華倫西亞,點知喺聯賽踢15輪先入得1球,連同各項賽事計上陣23場先入得3球。真係有料,都唔會踢成咁啦!
連同今次外借,巴舒亞伊已經先後畀「車仔」外借第3次,之前兩次分別借咗去多蒙特同華倫西亞,不過都唔能夠令人肯將佢買斷。據知,今次摩納哥嘅借用合約,都係唔包買斷,睇落就真係對佢唔算有好大信心。之但係咁講,巴舒亞伊以前踢法甲,喺2015/16球季,佢為馬賽踢36次入咗17球,曾經都係個多產射手,如果佢踢得番當年7、8成水準,話唔定真係可以救番摩納哥呀!
東網體育FB同你追實體壇每個精彩時刻!
支持本地運動員,一齊去「睇體」!