迪基亞五次神救!曼聯勇挫熱刺六連勝

2019年01月14日 02:23
東網電視
更多新聞短片
(法新社)

迪基亞下半場上晒身五次神救,力保曼聯清白之身,拉舒福特上半場攻入靚波足以一箭定江山,帶領紅魔鬼六連勝!今輪英超最觸目大戰,曼聯作客熱刺,今場係看守領隊蘇斯克查上任以來最大挑戰,福仔完半場前接應保羅普巴妙絕傳送窄位抽入領先,換邊後輪到迪基亞表演,先後救出迪利亞里兩次近射、艾達韋利特近門撞射同哈利卡尼禁區內嘅兩次埋門盡顯身價,成球隊贏1:0頭號功臣。蘇B帶隊後贏晒,封球會史上首個取得六連勝嘅新帥!

今仗曼聯搵福仔、安東尼馬迪爾打正前鋒,連格打攻擊中場,普巴、安達靴里拉同尼曼查馬迪鎮守中場,熱刺亦夫添出擊同紅魔鬼對攻,戰情精彩。8分鐘孫興民左路搞搞震,直線靚波質前,哈利雲克斯空晒射遠柱唔中龍。18分鐘捷比亞後場失誤,普巴直線質畀馬迪爾,後者殺入禁區過埋艾達韋列特窄位起腳,但洛里斯用腳閂走。之後熱刺慢慢取得主動,24分鐘熱刺右路角球都入,卡尼控定一抽被閂走;7分鐘後捷比亞右路斬中,迪利亞里二傳入中路畀卡尼門前撞入,但越位在先入波唔算。完半場前捷比亞又犯錯,右路橫傳被連格截到,普巴長傳勁靚,福仔右路窄位射遠柱入網領先半場。

換邊後熱刺狂攻,49分鐘迪利亞里質畀卡尼,禁區內右腳一抽,迪基亞用腳閂走,1分鐘後右路傳中,迪利亞里升起一頂,又畀迪基亞救出。曼聯唔係冇攻勢,54分鐘楊格右路出高波,普巴門前一頂唔夠角度,洛里斯接實;之後普巴衝入禁區一挑,洛里斯指尖掂到僅越楣而去。

迪基亞絕對係下半場主角,58分鐘熱刺右路角球開短跟手傳中,卡尼被力壓下近門一頂,過唔到迪基亞,66分鐘主隊黃金機會,卡尼中圈附近妙傳直線,迪利亞里長驅直進入禁區一射,又畀迪基亞封位救到。4分鐘後艾達韋列特接應右路角球第一時間撞射,又畀迪基亞神救。74分鐘迪利亞里入到禁區一抽,迪基亞又橫身撲出,完場前卡尼右腳交左路近門一抽,迪基亞一字馬用腳擋出。最終曼聯力保1:0勝果,蘇B上任後聯賽五連勝,已追到同阿仙奴同分。

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI