遠勝同齡卡尼!福仔曼聯第一神鋒

20190114
東網電視
更多新聞短片
(法新社)
今季披上曼聯10號球衣,唔少球迷甚至球評家,都對拉舒福特抱有懷疑之心,但於蘇斯克查麾下,福仔強勢大爆發,已用行動證明自己係紅魔鬼第一神鋒!於摩連奴時代,福仔並非必然正選,又周時被安排打邊鋒,表現一般不時受到寸王公開批評;但蘇斯克查將盧卡古貶為後備,倚重福仔數胡,呢名英格蘭前鋒盡展卡士,近五場聯賽攻入四粒,今仗鬥熱刺更一箭定江山,相信已令所有批評者收口。
於寸王時代,唔少曼聯名宿都認為福仔可當大任,但於摩連奴進攻體系,必須要用一名大舊射手擔大旗,福仔點會有運行?但蘇B卻轉為信任拉舒福特,福仔亦用助攻同入球回報新帥,於蘇B首戰鬥卡迪夫城,開波3分鐘後就開紀錄;近五聯賽共轟入四球,而近三場聯賽鬥般尼茅夫、紐卡素同熱刺,福仔每場入一球,係佢出道後首次連續三場英超入波,成其職業生涯一個里程碑。
福仔依家21歲,如果搵目前英格蘭第一前鋒哈利卡尼嘅同齡數據比較,無論係球會及英超出場次數及入球數,乃至國家隊代表情況,福仔都係較強一位,於後摩連奴時代,福仔前途的確無可限量。
拉舒福特、哈利卡尼同齡數據比較
148 球會出場次數 100
39 入球 25
96 英超出場次數 18
23 英超入球 3
31 國家隊喼帽 0
6 國家隊入球 0
東網體育FB同你追實體壇每個精彩時刻!
支持本地運動員,一齊去「睇體」!