派膠益曼聯贏波 新碧咸笑死人

2019年01月14日 05:00
東網電視
更多新聞短片
(互聯網)

炒寸王蘇B上場,曼聯勇不可當,今輪英超作客勁旅熱刺,前面有弗爆拉舒福特一箭定江山,中場有保羅普巴攻守兼備,門前又有鋼龍迪基亞貢獻本季最佳表現,上下一心以一球力克勁敵,表現教人激賞。熱刺方面其實亦唔曳,哈利卡尼、迪利亞里下半場施展渾身解數,頭腳並用多次埋門,若非一名隊友未瞓醒派膠,或者唔使全失三分。

熱刺右閘捷比亞,於俄羅斯世界盃四強對克羅地亞射入靚罰球一戰成名,唔少人叫佢新碧咸。呢名28歲三獅國腳,傳中的確有質素,但身為一名後衞卻經常大意犯錯,就算助攻力幾強都係嘥氣。今仗捷比亞於上半場兩次夢遊球場,第一次佢於中圈附近控甩腳,直接將個波交畀普巴,後者第一時間畀安東尼馬迪爾,好彩其攻門被洛里斯救出;到完半場捷比亞於毫無壓力下橫傳冇力被連格截到,普巴即時嚟個超靚助攻,福仔成功把握黃金機會射入,捷比亞成為輸波罪人。捷比亞攻強守弱已經唔係第一日嘅事,12月尾聯賽不敵狼隊,捷比亞已派膠累輸波,熱刺成績要再上一層樓,係唔係要繼續重用捷比亞,領隊普捷天奴要慎重考慮。

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI