無敵蘇B盡得人心 博彩公司為坐正派彩!

2019年01月14日 06:35
東網電視
更多新聞短片
(法新社)

延伸閱讀:
【迪基亞五次神救!曼聯勇挫熱刺六連勝】
https://bit.ly/2HazEKA 

【最精彩半場竟輸波 熱刺傷埋卡尼大鑊】
https://bit.ly/2TLCxTp 

曼聯王朝復興!紅魔怒炒摩連奴搵嚟蘇斯克查做看守領隊,聯賽連盃賽創下六連勝,今輪對熱刺被喻為上任以來嘅最大考驗,但蘇B並冇因作客而放棄進攻,反而同強敵快打快鬥攻,最後靠拉舒福特一記靚射領先半場,換邊後又有迪基亞貢獻今季最佳表現,左飛右撲頻頻神救成功守住大門,最後贏1:0再創佳績,蘇B亦成為球會歷史上,首位上任後即連贏六場嘅新帥。

蘇斯克查帶隊後,球隊上下萬眾一心,迅速扭轉紅魔本身死氣沉沉嘅困局,再有經典領隊費格遜出山加持,蘇B短短時間已將曼聯改頭換面,回復球隊本來面目,魔迷當然愛死佢,好希望呢位球會名宿,可以坐正正式統領曼聯。

今仗贏波後,曼聯官方Twitter鋪咗Story,入面注名「請留意#曼聯看守領隊對今戰睇法」,惹來魔迷非常不滿紛紛留言:「唔該第一時間刪咗看守領隊嘅字眼!」、「唔好叫佢看守領隊!佢係我哋最愛嘅蘇B」、「唔該畀啲尊重」、「我哋要蘇B坐正」、「曼聯球迷邊個都唔要,只要蘇斯克查!」

蘇斯克查帶隊成績攞足100分,唔少外國博彩公司都將其正式坐正賠率壓低,其中Paddy Power更已經派彩,認真誇張。蘇B賽後話:「迪基亞係全球最佳門將,佢有足夠實力,去挑戰雲達沙同舒米高,去爭曼聯史上最佳門神。今仗整體表現一流,菲爾鍾斯同域陀連迪路夫防守極佳,拉舒福特嘅埋門亦妙到毫巔。」

曼聯高層被廣泛認為,視熱刺領隊普捷天奴為紅魔新帥第一人選,今仗蘇B帶領曼聯擊敗熱刺,又視否有特別意義?「今仗唔係蘇斯克查對普捷天奴,最重要係取得三分。依家曼聯會全力追趕前列球隊,只要你係曼聯一員,絕對唔會只爭前四。我會盡力帶領球會力爭上游,其他嘢唔會多諗。」

延伸閱讀:
【迪基亞五次神救!曼聯勇挫熱刺六連勝】
https://bit.ly/2HazEKA 

【最精彩半場竟輸波 熱刺傷埋卡尼大鑊】
https://bit.ly/2TLCxTp 

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI