最精彩半場竟輸波 熱刺傷埋卡尼大鑊

2019年01月14日 07:15
東網電視
更多新聞短片
(法新社)

今輪英超矚目大戰,熱刺攻足成個下半場,十一次埋門中龍都射唔破迪基亞十指關,最後0:1不敵曼聯。今仗熱刺賠了夫人又折兵,除全失三分爭標機會渺茫外,最慘係完場前王牌哈利卡尼被菲爾鍾斯鏟傷,疑似傷及足踝韌帶,或需休養一段時間。本身熱刺已有孫興民要離隊踢亞洲盃,若哈利卡尼要長抖,熱刺都咪話唔大鑊。

哈利卡尼今仗踢得非常落力,於下半場個人就有兩次入波黃金機會,雖然處理得不俗,但均被迪基亞用腳救出,到完場前搏盡搶波下被鍾斯所傷,球證吹完場雞後,卡尼面容失落又痛苦,摸住隻腳明顯受傷,離場前仲趷吓趷吓,情況令人擔心。

普捷天奴表示:「我好擔心卡尼。雖然曼聯球員唔係有意,但嗰腳鏟波的確狼死,搞到卡尼整傷咗足踝,我哋要好好處理佢嘅受傷。孫興民已經要離隊征戰亞洲盃,如果卡尼都大傷埋,熱刺會好麻煩。」

對於今仗輸波,普捷天奴盛讚球隊下半場踢得好:「失波後球隊嘅反應好正面,下半場創造無數機會反勝,呢種決心同表現,就係可以問鼎冠軍嘅特質,而呢四十五分鐘,係我帶隊以來嘅最佳半場演出。我當然唔滿意個比數,但這就是足球。」

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI