【東體爭議】熱刺忠粉球證竟然幫曼聯
20190114
東網電視
更多新聞短片
保羅普巴(左)踩中迪利阿里膝頭位置。(互聯網)
熱刺喺英超主場以0:1不敵曼聯，比賽尾段保羅普巴兇狠踩中迪利阿里膝頭位置，被網民形容係熱刺忠粉球證嘅米奇甸恩，竟然畀個黃牌算數。賽後反曼球迷嘈到拆天，連執教過利物浦嘅桑拿士都忍唔住問，點解保羅普巴唔使食紅牌。
踢到78分鐘，保羅普巴喪衝踩中迪利阿里膝頭位置，賽後桑拿士話：「我覺得係紅牌，而且冇任何懷疑，保羅普巴知道自己做咗乜，佢衝埋佢，想用力量撞開對手，但你睇下個波喺邊，佢隻腳喺邊，如果球證唔覺得係紅牌，佢根本完全唔識波。」
其實米奇甸恩被指經常喺比賽中偏袒熱刺，仲有好多離奇舉動，2016年佢喺熱刺作客以4:1搞掂修咸頓嘅比賽中，竟然喺迪利阿里博到12碼後，豎起手指公畀Like，同時唔止1次畀電視鏡頭影到，佢喺執法期間趁熱刺入波做出慶祝動作。
只不過咁，英國網民今次反而畀Like米奇甸恩，甚至講笑話佢作出執法生涯最正確決定，事關好多人感覺，佢以往幫熱刺幫到出面，仲有人話，就算保羅普巴被逐，熱刺都冇辦法喺餘下時間攻入上晒身嘅迪基亞，所以唔覺得判決影響到賽果喎！
支持本地運動員，一齊去「睇體」！
東網體育FB同你追實體壇每個精彩時刻！