孫興民為砌中國 竟然咁樣做?

2019年01月14日 20:00
東網電視
更多新聞短片
(Getty Images/互聯網)

南韓球星孫興民尋晚先代表完熱刺鬥曼聯,雖然輸咗波,但唔代表佢有時間去輕鬆回氣散心,事關佢喺賽後仲要即刻趕去機場,爭取盡快飛抵阿聯酋阿布扎比,會合南韓國家隊出戰亞洲盃。由於南韓會喺周三晚出戰中國,孫興民為咗趕得切呢場波,尋晚仲特意更改行程,放棄直航,然後改到搭完飛機再轉車,爭取最早抵步,可見佢為鬥中國真係決心十足。

根據原本計劃,孫興民會喺鬥完曼聯之後,第二日先喺倫敦坐飛機直航阿布扎比。呢個安排係由於倫敦希思路機場每日只有4班航班直飛阿布扎比,而佢喺比賽後根本趕唔到當晚最尾航班,將被逼改搭第二日飛機,預計最快要到周二凌晨先抵步。

不過,對國家隊比賽極度上心嘅孫興民,其後決定更改計劃,就喺尋晚賽後即刻啟程去希思路機場,乘坐當地晚上10點飛杜拜嘅飛機,然後去到杜拜再轉車去阿布扎比,經此調動,孫興民就會喺當地時間周一上午到步,自然更加容易配合南韓國家隊嘅備戰安排。講到底,咪就係要佢抖好精神,喺星期三鬥中國囉!

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI