港超聯 新援駕到東方龍獅夜鬥理文

2019年01月14日 22:00
東網電視
更多新聞短片

「中銀人壽香港超級聯賽」今晚演獨腳戲,東方龍獅於主場香港大球場迎戰理文。主隊有葡萄牙中堅利馬彭利拿加盟,防守可望升呢;客軍亦有烏克蘭中場沙普夫和法國前鋒尼迪利來投,鋒線充滿新鮮感。今晚幾位新兵有望亮相,勝負要踢過至知!(周二晚8時開賽)

牛丸對利馬彭利拿有信心

東方龍獅經歷5場不勝後,上場反彈大勝凱景重回勝軌,今仗面對理文,主教練陳婉婷表示:「我相信理文會吸收上半季嘅經驗,我對佢哋兩名新球員都做咗分析。兩位球員經驗幾好,特別係踢過泰超嘅尼迪利,相信會畀到理文新衝擊,喺有質素嘅外援幫助下,華人都會發揮得更好,今場將會好艱巨。」對於頂替荷西安祖的新中堅利馬彭利拿,「牛丸」對他信心十足:「佢一對一、頭槌都幾好,踢法亦比荷西安祖硬朗,雖然只得24歲,但呢幾年佢喺葡甲站穩正選,能力同潛質都有資格喺港超立足。」

理文踏入2019年好消息頻傳,上仗兩球淨勝香港飛馬後,再有沙普夫及尼迪利加盟,惟主教練陳曉明表明需時調整:「始終佢哋來港前都係休季,狀態未必最好,融入球隊程度仲需要觀察。」對於東方亦有新中堅,「陳Sir」指首要做好本分:「我哋會保持自己嘅風格去做進攻,唔會針對對手新中堅去踢。」理文今周先後要鬥東方及傑志,「陳Sir」坦言賽程雖困難,但有足夠人腳去應付。

●陳焌鏗報道