【東體爭議】車路士簽希古恩？留莫拉達好過
20190116
東網電視
更多新聞短片
車路士1月份收購前鋒事在必行，近期盛傳佢哋將會簽入阿根廷前鋒希古恩，呢位31歲老將向來係球壇其中一個爭議人物，佢職業生涯入球數字「靚仔」，不過同時又被批評係敗家仔。睇番今季數據更加令「車迷」震驚，原來希古恩喺AC米蘭嘅數字，比起艾華路莫拉達更衰，買希古恩不如留番莫拉達算啦！
希古恩今季聯賽同歐霸盃上陣20場入8球，艾華路莫拉達喺呢兩項賽事同樣踢20場，有7個入球進帳，不過後者20場波只得14場係正選，而希古恩就20場都擔正。再睇仔細少少，希古恩嘅平均入球時間係216.3分鐘，反而艾華路莫拉達只需168分鐘，就連平均射門次數、射門準繩度同入球轉化率，都係艾華路莫拉達更好(見表)！
當然，車路士領隊沙利同希古恩曾經喺拿玻里合作無間，如果佢加盟或者會有「領隊加乘」，但係齋睇數據嘅話，真係好難令車路士球迷放心囉！
項目●希古恩●艾華路莫拉達
上陣●20場●20場(14場正選)
入球●8球●7球
平均入球時間●216.3分鐘●168分鐘
90分鐘平均射門●4次●4.1次
入球轉化率●10.4%●13%
射門命中率●32.5%●37%
東網體育FB同你追實體壇每個精彩時刻！
支持本地運動員，一齊去「睇體」！