【特稿】日本爭亞洲盃 一字記之曰：西
20190117
東網電視
更多新聞短片
(互聯網)
日本周四(17號)晚亞洲盃大戰烏茲別克，除咗靠班球員搏命，日本今次喺亞洲盃能否奪冠，仲要靠一個「無敵料理人」，令佢哋可以食好西！
冇錯！日本呢次係真正嘅食好西，事關佢哋個隨軍大厨真係姓西，全名西芳照。「藍武士」主帥森保一都認為佢係捧唔捧到盃嘅勝負關鍵之一，原因係西大厨煮嘢好食，有「媽媽嘅味道」，令班球員唔會因為飲食唔適應影響表現。
但係57歲嘅西芳照最把炮嘅地方，在於佢好好腳頭，2011年日本稱霸亞洲盃，2017年浦和紅鑽、2018年鹿島鹿角接連捧走亞冠盃，「西San」都係隨軍專屬厨師，所以有「亞細亞殺手」美譽，簡直係日本球隊嘅無敵吉祥物。
食住足球呢條水，西芳照喺日本飲食界成為咗食神，同企業合作推出杯麵、意粉醬、醋等產品唔在講，仲開咗唔少餐廳，最近佢就同東北地區聯賽2部南球隊磐城FC，喺位於福島縣磐城市嘅球會會所，開咗間叫「NISHI's KITCHEN」（直譯係西的厨房）嘅食肆。
國家隊專用大厨嘅餐廳會唔會好劏客呢？唔會喎！最貴嘅兩款菜色，包括有齊長友燒、刺身、煮物、炸物同沙律嘅四季彩便當，連稅係1,620日圓（約112港元）。連埋湯同沙律嘅牛肉漢堡套餐，都係呢個價錢。平啲嘅有咖哩牛肉飯套餐，連稅係1,404日圓（約97港元）、兒童奄列飯就864日圓（約60港元）之類，真係唔算好貴。想感受班日本國腳點樣食好西，假如咁啱旅遊福島不妨去試吓。
東網體育FB同你追實體壇每個精彩時刻！
支持本地運動員，一齊去「睇體」！