【有片】曼聯最強老兵回歸 盧卡古冇碇企
20190117
東網電視
更多新聞短片
(Getty Images)
即睇羅斯仔練波片段：https://bit.ly/2QUcYxQ
嘩嘩嘩，呢個邊個嚟？曼聯嘅卡寧頓訓練中心近日有個新面孔出現一齊練波，睇真啲，原來係初出道曾效力「紅魔鬼」嘅前意大利國腳基奧斯比羅斯呀！31歲嘅羅斯仔近年飽受傷患困擾，即使傷愈都未搵得番狀態，曾經同佢做過隊友嘅曼聯看守領隊蘇斯克查就決定幫吓佢，邀請佢嚟跟操提升狀態搵班落，但睇佢練波狀態唔錯，始終仲有高質素，唔知會唔會簽埋佢，到時近排失寵嘅盧卡古，咪隨時冇碇企？
羅斯仔04年就以17歲之齡代表曼聯出戰，可惜佢喺奧脫福一直未算太受重用，即使期間曾外借紐卡素一樣唔掂。反而07年佢過檔維拉利爾，就踢出球員高鋒，喺07至11年幾個球季，佢每季入球數字都達雙位數，特別係2010/11球季，佢喺各項賽事代表「黃色潛水艇」出戰56場就攻入32球，堅係犀利呀！
不過之後由2011年至2014年間，佢右膝就先後經歷4次重傷，然後多次長休，即使之後傷愈，佢輾轉效力過利雲特、切爾達同熱拿亞，只係都踢唔番當年水準，直到今季直頭冇班落。
對於仲算當打嘅羅斯仔嚟講，31歲嘅佢當然唔想掛靴，所以今次「蘇B」出手幫佢，梗係第一時間報到啦！雖然英國傳媒就傳出話「蘇B」今次搵羅斯仔，其實係想斟佢加入教練團喎，不過羅斯仔就喺twitter否認其事：「哈哈哈哈！我要做教練？？？」似乎羅斯仔仲未有退意喎。
東網體育FB同你追實體壇每個精彩時刻！
支持本地運動員，一齊去「睇體」！