【西多夫】蘇斯克查真係1個救全家

2019年01月18日 12:04
東網電視
更多新聞短片
蘇斯克查(右)救番曼聯好多球員。(Getty Images)

曼聯喺英超主場對白禮頓,看守領隊蘇斯克查有機會完成上任後7連勝,而且英國傳媒提到,迪基亞有望加薪到40萬鎊周薪續約,睇落蘇斯克查真係1個救全家。

新垣結衣新劇《不能成為野獸的我們》第7集,女主角深海晶嘅系統工程師同事,講咗段職場管理人員好需要知嘅對白:「我覺得工作就是信任,為了得到別人的信任,我會費盡唇舌,也會努力拚搏,要是沒有信任,就無法建立這種關係了。」

日劇同動漫經常有「出生以來從沒有被期待過」呢個主題,我想像唔到日本人成長過程有幾灰暗,但打工仔的確需要信任同被期待。摩連奴執教曼聯嘅時候,經常喺記者會上埋怨球員實力唔夠,又話有人落場唔夠搏命,難免令球員懷疑人生。

做得曼聯球員,肯定唔會差得去邊,原本沒有被期待過嘅紅魔球員,結果喺看守領隊蘇斯克查信任下集體爆發,一度成為清洗目標嘅桑馬達、安達靴里拉、艾舒利楊格同路爾斯華倫西亞全部有機會續約留隊,蘇斯克查堅救番唔少人。

另外,傳聞拉舒福特會加薪1倍至15萬鎊周薪,迪基亞對熱刺證明身價後,更加話會得到40萬鎊周薪新合約,如無意外,保羅普巴會排隊漲薪,蘇斯克查嘅信任好似多啦A夢嘅法寶,人人期望可達到,短期內所有曼聯球員都會甘心為佢賣命。 文:西多夫

支持本地運動員,一齊去「睇體」!
https://bit.ly/2DxX4XI 

東網體育FB同你追實體壇每個精彩時刻!
http://bit.ly/2ecTF2A