【公關災難】美白杯麵有用？大坂直美殺入決賽
20190124
東網電視
更多新聞短片
大坂直美食咗杯麵突然漂白？日本當今兩大最Hit網球手大坂直美、錦織圭，都係由日清食品贊助，趁住澳網如火如荼，呢間公司順勢推出兩人嘅杯麵動畫廣告，點知因為太過美化大坂直美，連膚色都由黑變白，成為一場國際公關災難！
當呢個動畫廣告一出街，就引起《紐約時報》、《衞報》等英美傳媒關注，因為大坂直美係個海地、日本混血兒，皮膚黝黑，但係動畫入面嘅佢，唔只樣貌靚晒，最離譜係白過白雪公主，自然畀人質疑歧視黑人，係種族歧視。日清食品知道瀨嘢之後，已經馬上將個廣告抽起，宣傳部仲即時用電郵公開道歉，強調事件不涉種族歧視，只係考慮不周。
公關災難係公關嘅事，大坂直美就專心打波，周四喺澳網公開賽女單4強，開出15個ace，以6比2、4比6、6比4，總盤數2比1擊敗K普里斯科娃，打入決賽，將會同捷克球手姬維杜娃爭冠軍。
大坂直美贏波之後，表現輕鬆，仲笑言喜歡墨爾本嘅炎炎夏日：「我喜歡酷熱，所以球場天頂被關閉反而唔好受。當天頂打開時，我倒覺得係我發威嘅時候了。」
東網體育FB同你追實體壇每個精彩時刻！
支持本地運動員，一齊去「睇體」！