高級銀牌　傑志羅梓駿：Mark伊高辛苦好多！

「高級組銀牌」周六（26日）於香港大球場上演，傑志以3比2擊敗和富大埔，繼2016-17年度再次捧走這項錦標。傑志今仗派上21歲小將羅梓駿擔任正選右閘，「羅梓」繼本月9日勇奪省港盃後，再次於香港大球場捧獎盃。在賽後接受訪問時，害羞的他也展現笑容：「緊張就唔係好緊張，因為之前省港盃有經驗，自己知道點樣去調節心態。季前冇諗過自己會喺香港大球場捧兩次盃，當然開心啦，不過個感覺真係好難形容，咁短時間入面捧兩次盃，仲要喺香港大球場，因為職業生涯好難得可以喺呢度捧盃。」

連同上場聯賽對理文，「羅梓」已連續兩場擔任正選，他表示：「自己喺練波、比賽都畀教練睇到進步咗，畀到信心佢哋，認為我可以踢正選，加上之前喺香港隊嘅表現，令到佢哋相信我有能力去踢正選。」今仗多次與伊高沙托尼交手，他坦言：「打個比喻啦，省港盃我mark盧琳，今場mark伊高我覺得辛苦好多，大家都知佢係變速好快嘅對手，自己都要用多一倍嘅跑動、力量去mark佢。」

目前球季已過一半，「羅梓」期望：「希望喺球會Keep住有正選機會，幫球會一路贏落去，攞晒所有冠軍，亦都希望3月代表香港出戰U23亞洲錦標賽外圍賽嘅時候，可以成功出線。」他續說：「自己都有信心去爭正選，我都好想踢亞洲賽，因為可以對出面嘅對手，挑戰更高水平，希望喺練波畀到信心教練。」

至於第二次為傑志上陣的馬特史密夫稱：「我好開心，今場係一場好艱難嘅比賽，我好好彩入到波，亦好高興能夠捧盃。」