【熱刺連失兩盃】普帥幾日前咁寸利物浦
20190128
東網電視
更多新聞短片
（Getty Images）
熱刺於英足盃第四圈，作客水晶宮淨吞兩蛋出局，球隊送禮輸12碼之後，自己有得射又宴客，咁樣出局相信球隊都冇得好怨。本周對熱刺嚟講堅慘痛，四日前佢哋於英聯盃四強次回合射輸12碼，被車路士淘汰出局，依家連英足盃都冇得玩，依家剩番英超同歐聯可以爭。
四日前未打英聯盃四強次回合，雖然熱刺傷兵滿營，不過當時領隊普捷天奴仲係好有心情，仲得閒寸利物浦。被記者問到熱刺係唔係冇足夠人腳多線爭盃，普帥話：「你哋個個都話，利物浦同曼城有英國球壇最好人腳，但我見紅軍依家喺杜拜喎（利物浦先後於英聯盃及英足盃第三圈出局，本周係本土盃賽周，故去咗杜拜操練）。熱刺仲有四個冠軍可以爭。」呢個故事教訓我哋，說話唔好講得太盡；唔係好似普帥咁，轉眼間同被寸對象同一下場就唔好啦。
東網體育FB同你追實體壇每個精彩時刻！
支持本地運動員，一齊去「睇體」！