連攞五次每月金球 林伯幫利物浦煉成巨星
20190209
東網電視
更多新聞短片
（互聯網）
（片段：哈利威爾遜五粒金球，第一球係一月金球，第二球係十二月金球，如此類推）
利物浦本季表現出色，有機會挑戰英超冠軍，不過球隊後防被受傷患影響，中場又缺乏創造力，佐敦軒達臣、韋拿杜姆、占士米拿只屬工兵，阿歷士張伯倫傷咗後，根本冇人識遠射，當埃及文明被嘜死後，紅軍周時都老鼠拉龜。但查實利物浦陣中已有個犀利進攻中場，連攞五次最佳金球，唔係超級罰球就係妙絕遠射，佢就係哈利威爾遜！
呢名遠射王個樣勁似費蘭度托利斯，本季被借到英冠打比郡跟林伯特學嘢，已經入選威爾斯國家隊，而且踢得頭頭是道。曼聯今屆英聯盃被打比郡淘汰，哈利仔已經入過一個勁靚罰球，你以為佢只係偶一為之？佢就用行動話你聽自己大把貨賣，自上年九月開始，連攞五次隊中每月最佳金球。踢咗大半季，哈利仔以中場身份怒入十個聯賽入球成為「綿羊」陣中神射手，今季已攻入五個罰球，成為全歐洲其中一個射入最多罰球嘅球員。
睇番一月金球，佢入楔時間啱啱好，左腳一攞之後怒抽近柱入網，成個過程一氣呵成。雖然英冠水準不如英超，但哈利仔五個最佳金球中，兩次係由罰球取得，可以大膽講句依家利物浦陣中，冇一個射罰球勁過佢。哈利仔於林柏特麾下球技大躍進，紅軍如果下季唔重用佢，就真係嘥晒！
支持本地運動員，一齊去「睇體」！
東網體育FB同你追實體壇每個精彩時刻！