日職揭幕夠養眼 仲有「J」送
新一季日職本月22日揭開戰幔，由大阪櫻花喺長居主場對神戸勝利船，呢場被形容為「J聯賽史上最高級揭幕戰」嘅「關西對決」，唔只睇得養眼，仲有免費餐歎，同埋有「金Ｊ」醒你添！
呢場史上第一次喺星期五上演嘅揭幕戰，本身已經好夠號召力，因為大衞韋拿、恩尼斯達呢對前巴塞雙星、前德國國腳普多斯基，以至前日本國腳山口螢都會披起神戸波衫搏殺，但係日職主贊助商覺得未夠喉，搵埋日本大型女子偶像團體NMB48（又稱「難波48」）嚟助興，半場時候獻唱新歌「壁龕直坐的女兒」。佢哋係繼SKE48之後，第二個AKB48姊妹團體，個專屬劇場所就係喺大阪同關西地方為主，所以揾佢哋都好正路。事實NMB48主力成員包括「山本彩接班人」小島花梨、上西怜、山田夢莉、川上禮奈、久代梨奈、山尾梨奈等人，個個青春美麗，唔識波嘅入到場，都唔慌覺得冇嘢睇。
況且現場仲會派發3萬件「金Ｊ」限量棒球衫，先到先得，乜係「金Ｊ」？意思咪係金曜夜（星期五晚）嘅Ｊ聯賽囉，件件衫個左袖都有個「金Ｊ」章，好有紀念價值；球場外又會免費提供45,000份肉腸湯，球迷真係又食又拎。