費高倒戈收豬頭 反骨仔高圖爾斯收乜？
20190210
東網電視
更多新聞短片
泰拔高圖爾斯被球迷針對足全場。(互聯網)
球壇反骨仔從來唔易做，尤其倒戈反前東家，肯定會畀球迷針對大喝倒彩，好似當年前世界足球先生費高由巴塞隆拿過檔皇家馬德里，結果有次佢倒戈返魯營球場，就畀球迷掟個豬頭去招呼！至於曾經效力馬德里體育會嘅比利時門神泰拔高圖爾斯，尋晚喺馬德里打吡代表皇馬倒戈馬體會又收到乜？咪就係成堆玩具老鼠囉！
把口唔收嘅泰拔高圖爾，無論係由馬體會轉投車路士，以至由車仔過檔皇馬，佢都係經常口衰講錯說話，得罪晒馬體會同車仔球迷。尋晚佢倒戈返到母會馬體會，雖然贏咗場波，但就全場都係球迷狂噓狂鬧對象囉！
就好似喺馬體會主場外面，佢哋都會為所以曾代表球會出賽100次以上球員製作銘牌，鑲喺球場外地下。高圖爾斯曾經代表馬體會上陣154次，但依家只見佢個銘牌就畀球迷吐口水，仲擺上幾隻玩具老鼠，事關喺當地文化，原來老鼠係代表叛徒喎！
至於當佢步入球場，當然係引發全場狂噓啦！此外，唔少球迷都將玩具老鼠掟去龍門後面，擺明又係要侮辱高圖爾斯呢隻過街老鼠囉。對於成為馬體會球迷狂噓對象，呢位比利時門神今次終於識收口：「我好平靜，頭腦都好冷靜，我唔關心呢啲，我只係嚟比賽，其他都冇意義。我喺馬體會效力3季，呢一切都唔會被抹煞，我仲好尊重馬體會，而喺馬路上，馬體會球迷都有祝福我，只不過今場係馬德里打吡啫！」
支持本地運動員，一齊去「睇體」！
東網體育FB同你追實體壇每個精彩時刻！