【有片】尾場跑梗頸四！韋達掛靴戰留憾呀！

自從1月下旬向外宣布退下綠茵場轉做練馬師嘅韋達，一連五期賽事全部坐騎敗走，當中更有唔少熱門坐騎添，所以好多馬迷都以為，韋達臨退休前志在安安全全過線點、唔會再有拼勁贏馬了，不過原來大家都錯晒，今日十三少(韋達暱稱)連場搏殺，第二場「牛角仔」同第七場「大風暴」及第八場「帆哥兒」都能搏入位置得2亞1季，堅有心在最後一日贏馬，但仍然未有頭馬交出，跑完第九場「錶之銳」又係只跑第六，而去到尾場熱門馬「志在四方」，雖然在內欄奮力搵位而上，但最終都係只跑第四，未能在掛靴戰贏馬，韋達始終留憾，但佢已將最好嘅畀晒馬迷了！

剛剛第四場後有歡送韋達嘅儀式，咁主人家韋達，就梗係企定定準備出去同馬迷見面揮手喇，但呢一個時候，有位騎師走去同十三少玩噃，係邊個？咪就係昔日同韋達鬥餐死嘅潘頓囉，呢位兩屆冠軍堅玩得呀，竟然烏低身扮幫韋達擦鞋，咁韋達表情都非常受落呀，之後搞完一輪，潘頓又變番正經同今日呢位馬場主角握手，所以話馬場真係冇隔夜仇，下季潘頓騎韋廐馬將成事喇！

今日咁大日子，韋達全家包括老婆、囡囡同仔都到嚟撐場，而且靚靚囡囡今日仲中門大開，極有睇頭呀！韋達在第四場後歡送儀式上，話好多謝馬會、馬會一眾董事、練馬師、公眾馬迷同埋潘頓等一眾競爭者，佢話佢同其他騎師之間一直推動大把不斷進步，佢亦特別多謝雷神同潘頓，佢哋令佢變得更好，之後就睇佢兩個表演喇！而佢亦多謝家人，太太令佢後顧無憂，而今日亦係佢囡囡19歲生日，特別有意義，搞到在旁嘅囡囡傻笑、好老尷呀。

成班騎師等韋達講完嘢，就約定晒咁走過去拋起韋達，仲要係堅拋高，搞到十三少雙腳過晒頭，超好笑呀，不過真係要小心韋達條腰，47歲喇，男人條腰好緊要呀，好彩最尾莫雷拉同蘇兆輝兩位巴西名將，一左一右小心翼翼托返住十三少，堅有愛呀！

拋完韋達，一眾騎師又噴主角香檳，好多個好似莫雷拉、蘇兆輝同田泰安，都好似大細路玩到癲晒咁，搞到韋達成面都係呀，之後抹乾淨晒，韋達再同老婆、囡囡同囝囝正正經經影大合照，成家人最後一次見爸爸著綵衣，呢張相真係要好好珍惜！