菁英盃　窿對窿！夢想FC出線四強

「菁英盃」周日（10日）尾場由夢想FC對東方龍獅，雙方各有機會爭取入球，惟一一失諸交臂，最終踢成0比0平手，夢想以7分出線四強。

開賽初段東方龍獅較主動，6分鐘，笠臣橫傳予林學曦，後者勁射被屠俊翹撲出。15分鐘，迪高接應傳中，頭槌跣後，後上的黃梓浩狂抽被屠俊翹接實。2分鐘後，夢想搶回不少攻勢，川瀨浩太於混戰中射入，但球證羅碧芝指「高達」犯手球在先，入球不作計算。21分鐘，拿祖底線前回傳，無人看管的希堅奴撞射高出。5分鐘後，夢想搏得罰球，混亂中陳偉豪抽射惜省中守衞，皮球輾轉落到希堅奴腳下，他回傳予黎厚希，惟「黎厚」的遠射未能命中目標。37分鐘，東方差點開紀錄，笠臣接應迪高橫傳後，施放冷箭僅柱邊出界，雙方踢成0比0完半場。

換邊後，雙方均積極進攻，夢想先有「Fat Gor」於53和59分鐘先後頭頂腳踢，均未能射破梁宇昊的十指關。61分鐘，東方有笠臣接應林學曦橫傳遠射炒高。4分鐘後，川瀨浩太接應罰球衝頂頭槌，惜未能命中目標。66分鐘，麥基偷得皮球後，推順再起腳卻炒高。71分鐘，夢想先後有陳偉豪頭槌和希堅奴勁射，同樣未能轉化成入球。比賽末段，東方搶攻，83分鐘，麥基接應黃梓浩傳中頭槌攻門僅中網頂，5分鐘後林嘉緯主射罰球被屠俊翹打出。最終雙方踢成0比0完場，夢想鎖定四強席位。

賽後至於夢想FC主教練梁志榮表示：「其實預期係攞1分，兩隊各踢半場好波，球員紀律執行上比之前差，半場嘅時候同佢哋講去改變，下半場攞番好多優勢，都滿意嘅。依家7分出線，只係睇首名定次名。」至於球隊日援川瀨浩太今仗首次擔任正選並踢足全場，「梁Sir」稱滿意其表現，有60至70分。

東方龍獅暫代主教練黃鎮宇表示滿意球員發揮：「一開波到臨完場，球員都不斷去壓迫，喺失波嘅時候想搶番個波，球員態度好正面。」球隊原主教練陳婉婷早前辭任，「黃Sir」認為影響不大：「職業足球總有呢啲狀況，踢波唔係一個人，團隊唔係一個人，一個人做唔到啲乜。就是和波又好、贏波又好，係教練團同球員嘅功勞，唔係我一個人嘅功勞。」他又謂：「球隊今場轉咗踢442陣式，睇下一個新嘅陣式，會唔會有新元素刺激到球員，去踢進取啲嘅足球，希望轉變到一啲嘢。」