【魔門戰】迪馬利亞：曼聯糟蹋了我
20190212
東網電視
更多新聞短片
周三(13日)凌晨歐聯16強首回合大戰，曼聯主場對巴黎聖日耳門(PSG)，真係話題多到數唔晒，其中一個焦點必定係PSG翼鋒迪馬利亞倒戈。
呢位綽號「天使」嘅阿根廷國腳2014年夏天，以當時天價5970萬鎊由皇馬加盟曼聯，仲着埋紅魔鬼傳奇7號，但「天使」與「魔鬼」從不兩立，迪馬利亞僅效力一季，就被賣去PSG，佢講番當年被前主帥尹戈爾糟蹋，失意於奧脫福。
迪馬利亞話：「我只係效力曼聯1季，當時並非我球員生涯嘅好時期，或者咁講，係佢哋令我冇好日子過，當時我同領隊(尹戈爾)發生咗問題，但係感謝上帝，我可以來到PSG，令我重新做番自己。」
將於周四(14日)情人節31歲生日嘅迪馬利亞腳法秀麗，側擊力強，但同當時曼聯主帥尹戈爾嘅戰術格格不入，表現大受影響，該季只曾於英超上陣27次入3球，最後被曼聯以4400萬鎊賣去PSG。
迪馬利亞同PSG橫掃法國球壇，成為球隊主力，即使球會近年簽入尼馬、基利安麥巴比，都未能動搖佢嘅地位。
由於尼馬、卡雲尼受傷缺陣，「CNM鋒線」得番基利安麥巴比，迪馬利亞今場正好以老大哥身份，率領球隊反擊，要喺自己當年跌倒嘅奧脫福球場，企番起身。
東網體育FB同你追實體壇每個精彩時刻！
Follow東網體育IG一齊撐本地運動員！