鬥PSG最後檢閱　曼聯捧歐聯5大理由！

香港時間今晚深夜，曼聯於歐聯16強首回合大戰巴黎聖日耳門，PSG貴為法國班霸，不過球隊有尼馬、卡雲尼及比利時右閘梅尼亞受傷缺陣，連保羅普巴都公開承認，尼馬落到唔場，曼聯係非常好彩。相反紅魔鬼就冇主力受傷，大勇嘅拉舒福特、連格同艾舒利楊格將回歸正選，配合普巴、安達靴里拉等弗爆大將，紅魔喺奧脫福出擊隨時佔到甜頭。

巴黎聖日耳門近期頭頭碰着黑，先有王牌尼馬重創，對上一場法甲更傷埋卡雲尼同梅利亞，主帥杜曹肯定頭痕。外地傳媒優先披露PSG點排陣，保方將會正選把關，剛傷愈嘅馬高華拉堤亦會落場。因前線傷將甚多，德國達斯拿會首發，而前巴塞翼衞丹尼爾，就會推前打翼鋒，支持基利安麥巴比同迪馬利亞。

曼聯於上年12月辭退摩連奴、換上蘇斯克查做看守領隊，可能係本季最佳決定。紅魔鬼於蘇B麾下勇奪10勝1和，表現、戰績大躍進，球隊愈踢愈好，目前氣勢如虹，外媒甚至被認為可以挑戰歐聯冠軍，羅列出以下5大理由：

1.領隊

曼聯前球員恩斯，認為蘇斯克查唔夠料做球隊正式領隊，覺得只因摩連奴之前搞得太差，就算唔係蘇B帶隊，曼聯都能回勇。但有成績有真相，帶隊11場10勝1和，於歐洲任何一個主要聯賽都係驕人成就。蘇B流着曼聯血液，背後仲有費格遜撐腰，帶領曼聯係絕配。摩連奴、哥迪奧拿、安歷基、施丹等主帥，都係首次衝擊歐聯就取得冠軍，蘇B成功亦唔出奇。

2.無所畏懼

做事最忌畏首畏尾，曼聯依家當頭起，呢股力量不能小覤。於摩連奴時代，球隊籠罩住負能量，依家蘇B帶隊後，成隊精神面貌完全唔同，一直向住正確方向前進。球隊用咗兩個月時間，就殺番前英超前四，球員信心爆棚，依家邊隊勁旅夠膽話啅硬曼聯？

3.球星才華橫溢

於摩連奴時代，基本上所有曼聯球員都跌Watt，不過迪基亞同保羅普巴，依家已再表現出世界級水準。拉舒福特及安東尼馬迪爾，係現今球壇兩大新星，連格亦係大賽球員，再加上域陀連迪路夫表現大躍進，曼聯陣容對比歐洲列強唔輸蝕。

4.夠運

曼聯16強鬥巴黎聖日耳門，本身唔算係好籤，但PSG卻突然有尼馬、卡雲尼缺陣，呢兩名球隊絕對主力，首、次回合都會缺陣，曼聯於歐聯明顯有運。

5.車路士元素

曼聯本季已無緣挑戰英超冠軍，但歐聯並非一定係於聯賽表現最出色嘅球隊奪得。以12年為例，車路士於德國土地擊敗拜仁奪標，嗰年拜仁成為三冠王。車路士亦於四強淘汰被視為奪標熱門、實力比自己更強嘅巴塞隆拿。曼聯唔使為英超冠軍而煩惱，可集中力量力爭歐聯，可以走到最後都唔奇。