亞冠外 朱志光:球員意志好好!

2019年02月13日 00:30
東網電視
更多新聞短片
(何彥霆怡保直擊)

【何彥霆怡保直擊】傑志周二(12日)於亞冠盃外圍賽不敵霹靂,賽後主教練朱志光表示球員鬥志可嘉:「整體上我哋各樣嘢都做得好好,因為天氣熱,上半場等佢哋逼下我哋,好唔好彩有一個犯錯,越位陷阱裝得唔好先失守,再唔好彩就係史密夫兩黃一紅被逐出場。有樣嘢開心嘅係球員冇放棄到,好有耐性,最終都能夠追番球打和。其實加時嗰陣我個心都諗住:『唉,加時10個打11個都死。』點知班球員嘅意志好好,同埋有啲球員今場打得唔錯,譬如黃洋,打10個嘅時候佢去填位,甚至移佢打右邊都OK,戰術上其實改變好多,但係能夠去到互射十二碼階段,輸咗我都冇話好講。球員完成咗好好嘅責任、工作,雖然紀錄唔好,但係一個好好嘅經驗,唯有希望集中精神去踢亞協嘅比賽。」

球隊雖無緣亞冠盃附加賽,但仍能出戰亞協盃分組賽,「朱Sir」認為不能小覷對手:「我哋都好幾年冇打亞協,亞協水平雖然唔高,但係都有啲球隊好強,特別係北韓落咗嚟踢亞協分組賽,我哋都有困難。因為作客北韓唔係一件容易嘅事,相比起馬來西亞更難。」

問及「朱Sir」為何把16歲小將陳晉一列正選時,他坦言是「早有預謀」:「佢有能力應該畀佢試,部署上我係諗住如果我出晒啲正選,嚟到作客咁熱、潮濕嘅地方,我個後備席就會冇咁有實力,所以我都留住一班好嘅球員去到咁上下出。但係變化比計畫嚟得快,所以要因應場入面嘅情況而調配。阿龍(鄭展龍)跑咗兩段之後話唔舒服,所以用唐建文換番佢出去,希望捱到12碼。終於到去到12碼,但係射12碼差一步,百分之九十九贏場波,唔入嗰腳轉個頭又輸,雖然嘥咗個機會,但係我都唔會怪球員。」