【未亡人系列】35歲亨特拉爾爆皇馬陰暗面
20190213
東網電視
更多新聞短片
將於周四(14日)凌晨上演嘅歐聯16強首回合，阿積士主場對皇家馬德里，大家將會見到一位熟悉嘅面孔，就係荷蘭射手亨特拉爾。
呢位綽號「獵人」嘅35歲老將10年前，由阿積士轉投皇馬，以為從此飛黃騰達，點知只得半季，就被賣走，對當時年少得志嘅亨特拉爾，絕對係一次重大打擊。
兩年前重返阿積士嘅亨特拉爾倒戈前夕，大爆皇馬係一間無情嘅球會，任何人一失去利用價值，都會被踢走：「無可否認皇馬係一間規模龐大嘅球會，巴拿貝球場係我踏足過最靚嘅球場，喺嗰度比賽，氣氛非常濃厚，你好似感受到球迷熾熱眼光，一直喺背後燃燒住你，呢種回憶的確好難忘。」
不過，亨特拉爾當時對皇馬並冇歸屬感：「我只係10年前短暫效力過皇馬，呢間球會所有人都只係過客，包括教練、總監、會長。當需要你嘅時候，你就可以留低，唔需要嘅時候，就踢走你，我本來可以留隊多幾年，但呢種文化，令我冇興趣留隊。」
亨特拉爾離開皇馬後，踢過AC米蘭1季，之後轉投史浩克04，效力長達7年，期間更曾於2013/14及14/15年，連續2季歐聯16強倒戈對皇馬，結果4場比賽之中，史浩克04輸咗3場，包括2014年主場慘敗1:6，呢兩屆都被皇馬踢出局。
亨特拉爾今屆16強又倒戈皇馬，佢認為只要阿積士踢出分組賽嘅水準，足以同對手抗衡。佢今季荷甲上陣19次入10球，勢必成為皇馬防線心腹大患。
東網體育FB同你追實體壇每個精彩時刻！
Follow東網體育IG一齊撐本地運動員！