白領變美女賭神 全職玩撲克半年贏百六萬

20190213
東網電視
更多新聞短片
(互聯網)
馬來西亞原來有個90後女賭神!今年28歲嘅Natalie Teh Siew-po,本身係個普通女白領,但佢舊年決定辭去工作,接受全職撲克選手訓練。起初無論係父母抑或朋友都反對佢咁做,但Natalie好快就展現出天才撲克手天份,約半年就贏咗約20萬美元(約160萬港元),打入全馬來西亞撲克玩家財富榜第23位。Natalie表示,佢性格冷靜、完全唔情緒化,朋友都話佢簡直係「機械人」,可能就係佢成為女賭神嘅關鍵。
Natalie於澳洲讀完大學後,曾任職航空公司,之後加入有「東南亞Netflix」嘅Iflix工作,喺朋友眼中前途無限。不過Natalie不甘於平淡,毅然辭職轉做撲克手。做撲克手一啲都唔輕鬆,每日起碼要訓練超過8個鐘;如果比賽時間,更加要訓練12至15小時,仲要不時研究點改進技巧、分析同研討戰術。
Natalie生於吉隆坡,係華裔女孩,佢話自己細細個就識鋤大弟等啤牌玩法,對佢依家成為撲克手好有幫助。佢轉做全職撲克手後順風順水,於好多比賽中出盡鋒頭,成為撲克界最觸目新人,於馬來西亞撲克玩家財富榜中,佢列於女性第一位;而喺女性世界撲克玩家榜入面,就排第25位。Natalie表示,希望今年可以殺入「女性榜」嘅頭5位。而Natalie全職投入撲克界,係同男朋友有關;佢男友亦都係撲克手,贏過近400萬美元,二人周時結伴到世界各地比賽。
Natalie聲名大噪,未來會參加更多全球頂尖撲克大賽,獎金吓吓數百萬美金起步,相信呢位女賭神,第時將愈來愈富有!
東網體育FB同你追實體壇每個精彩時刻!
Follow東網體育IG一齊撐本地運動員!